Մեր թերթի նախորդ՝ մարտի 21-27 համարում, մեր հեղինակներից Հասմիկ Սարգսյանի «Հիսուս, խնդրում եմ՝ բաց թողնես ցավով լի իմ թշվառությունը» վերնագրի ներքո Բախի նշանավոր կանտատի օրերս կայացած համերգի մասին գրած հոդվածին ստորեւ արձագանքում է երգչուհի Գոհար Ազիզյանը, հիշեցնելով բոլորիս, այդ թվում՝ համերգը կազմակերպողներին ու լրատվամիջոցներին, նաեւ մեզ, որ հիշյալ համերգը պետք չէ համարվի Երեւանում առաջին կատարում, քանզի առաջինը կատարվել է 12 տարի առաջ, ականավոր մաեստրո, մեր թերթի բարեկամ, հանգուցյալ Զավեն Վարդանյանի նախաձեռնությամբ:
Ճշտում ենք՝ ապավինելով ընթերցողների ներողամտությանը:
«Ազգ»
Ինչպես հայտնի է, վերջերս հայ երաժշտասեր հանրությnւնը կրկին առիթ ունեցավ առնչվելու համաշխարհային դասական երաժշտարվեստը ներկայացնող մի գեղեցիկ ստեղծագործության: Երեւանի Կոմիտասի անվան Կամերային Երաժշտության Տանը եւս մեկ անգամ հնչեց մեծն Յոհան Սեբաստյան Բախի հեղինակած 200-ից ավելի հոգեւոր եւ աշխարհիկ կանտատներից 35-րդը՝ գրված մենակատարող մեցցո սոպրանոյի, մենակատարող երգեհոնի (organ obligato) եւ կամերային նվագախմբի համար: Ինչպես եւ Յ.Ս. Բախի բոլոր հոգեւոր կանտակները, այս կանտատի վերնագիրը եւ գրական մասը նույնպես վերցված է Սուրբ Գրքից եւ կոչվում է «Միտքս եւ հոգիս այլայլված են» (kantata BWV 35 Geist und Seele wird verwirret ):
Արժանահիշատակ է, որ այս գողտրիկ, բայց անչափ հմայիչ կանտատի երաժշտական մեկնաբանումը եւ բեմական ԱՌԱՋԻՆ կատարումը Հայաստանում տեղի է ունեցել 2013 թվականի Մայիսի 25-ին, Կոմիտասի անվան Կամերային Երաժշտության տանը՝ Ազգային Հոգեւոր Կենտրոնի եւ վերջին տասնամյակների հայ կատարողական արվեստի ականավոր գործիչ՝ դիրիժոր, երաժշտագետ եւ մանկավարժ Զավեն Վարդանյանի գլխավորությամբ կայացած համերգի ընթացքում:
Համերգը երկու բաժնից էր կազմված: Ազգային Հոգեւոր կենտրոնի ղեկավար Մհեր Նավոյանը եւ Մաեստրո Զավեն Վարդանյանը խիզախել էին մեր երաժշտասերին ներկայացնել հոգեւոր երաժշտության համերգի բարդ ձեւաչափ, երբ համերգի երկու բաժիններից յուրաքանչյուրն ընդգրկում էր մեկական երաժշտական կոթող:
Այսպիսով, 2013 թվականի Մայիսի 25-ին ներկայացված հոգեւոր երաժշտության համերգի առաջին բաժնում հնչել է Անտոնիո Վիվալդիի 7 մասից բաղկացած Nisi Dominus հանրահռչակ ստեղծագործությունը, մենակատարող մեցցո-սոպրանոյի, մենակատարող երգեհոնի եւ կամերային նվագախմբի համար, իսկ նույն համերգի երկրորդ բաժնում հնչել է Յ.Ս. Բախի 35-րդ կանտատը՝ նույն կազմով:
Համերգի կատարողական կազմն էր. դիրիժոր եւ երաժշտական ղեկավար՝ ՀՀ արվեստի վաստակավոր գործիչ ՝ Զավեն Վարդանյան, օպերային մեներգչուհի՝ Գոհար Ազիզյան, երգեհոնահար՝ Հարություն Թագվորյան, ջութակահարուհի՝ Ջեմա Աբրահամյան: Համերգի նվագակցող նվագախումբն էր «Երեւան» կամերային նվագախումբը:
Ավարտելով, ավելորդ չէ նշել, որ մենք՝ մենակատարներս երջանիկ ենք, որ 2013-ին մաս ենք կազմել հրաշալի եւ շատ ջերմ, բայց բավական բարդ համերգի կայացմանը եւ անչափ երախտապարտ ենք սիրելի Մաեստրոյին՝ հայ եւ համաշխարհային երաժշտությունը ներկայացնող հոյակերտ բեմական կատարումների բազմամյա շքերթի համար:
ԳՈՀԱՐ ԱԶԻԶՅԱՆ
