Նույն շրջանում թատրոնին հրաժեշտ է տվել երկու ռեժիսոր, մեկը՝ ոչ սեփական կամքով
Մոտ տասն ամիս է՝ Ստանիսլավսկու անվան ռուսական դրամատիկական թատրոնը չունի գեղարվեստական ղեկավար: Տնօրեն Սուրեն Շահվերդյանն աշխատանքից ազատել է Կարեն Ներսիսյանին: Գրեթե նույն շրջանում թատրոնը լքել է նաեւ Նորա Գրիգորյանը՝ սեփական նախաձեռնությամբ: Ինչո՞ւ է ռեժիսորը՝ թատրոնի երկարամյա գեղարվեստական ղեկավար Ալեքսանդր Գրիգորյանի դուստրը, դիմում գրել, Շահվերդյանն այսպես արձագանքեց. «Նա երկու անգամ է դիմում գրել: Առաջինի ժամանակ երկար սպասել եմ, որ, գուցե, հետ կանգնի գնալու մտքից: Այդպես էլ եղել է: Երկրորդի ժամանակ ասել է, որ այս պահին իրեն թատրոնում չի տեսնում ու գնացել է: Ես նրան ասել եմ շնորհակալություն կատարած աշխատանքի համար, եւ հրաժեշտ ենք տվել միմյանց»:
Իսկ ի՞նչ է եղել 2018-ին ՝ իշխանափոխությունից հետո, Հայաստան հրավիրված Ներսիսյանին աշխատանքից ազատելու պատճառը, եւ ինչո՞ւ է թատրոնը մնացել առանց գեղղեկավարի: «Հայաստանում էլի՛ կան թատրոններ, որ մնացել են առանց գեղարվեստական ղեկավարի: Դա նորմալ է, օրենքի խախտում չկա: Ներկայացումներ դնում ենք ես ու մյուս՝ հրավիրյալ ռեժիսորները»,- նշեց տնօրենը:
Ճշտող հարցին՝ իրավունք ունի՞ տնօրենը նաեւ ներկայացում բեմադրել, Շահվերդյանն արձագանքեց. «Տնօրենն, այո, իրավունք ունի զբաղվելու ստեղծագործական աշխատանքով»:
Նա նշեց նաեւ, որ ռուսական թատրոնն այժմ չունի հաստիքային ռեժիսոր, գործակցում են միայն հրավիրյալ բեմադրիչների հետ:
Կարեն Ներսիսյանի արձագանքը շեշտակի տարբերվող էր. «Ազատման դիմումի հիմքում եղել է, այսպես ասած, երկու պատճառ: Առաջինն այն, որ ինձ հասանելիք արձակուրդից մեկ օր ուշ եմ վերադադարձել: Իսկ ուշ եմ վերադարձել, որովհետեւ որպես բանախոս մասնակցում էի Սանկտ Պետերբուրգի միջազգային մշակութային ֆորումին, ինչին, ի դեպ, ներկա էր նաեւ փոխնախարար Դանիել Դանիելյանը: Երկրորդ՝ իբրեւ թե, աշխատանքից երեք օր բացակայել եմ՝ առանց զգուշացնելու: Այնինչ, ո՛չ թե բացակայել եմ, այլ՝ մեկնել եմ կոնֆերանսի՝ «Արտերկրի ռուսական թատրոնները» թեմայով, ինչի ավարտին Ստանսիլավսկու թատրոնը ստացել է դրամաշնորհ ու բեմադրել նոր ներկայացում՝ Պուշկինի գործերի հիման վրա: (Կոնֆերանսը նվիրված էր պոետի 225-ամյակին): Բայց իմ գործուղման մասին պատշաճ ճանուցել եմ թե՛ թատրոնի տնօրենությունը, թե՛ ԿԳՄՍ նախարարությունը»:
Շահվերդյանի որոշման իրավաչափությունը Ներսիսյանը վիճարկում է դատարանում: «Ազգ»-ին նա ասաց, որ Առաջին ատյանում դատը պարտվել են: Բողոքարկել են, հայցը հիմա Վերաքննիչում է:
«Ազգ»-ի տեղեկություններով, ռեժիսորի եւ տնօրենի ջրերը սկսկել են մեկ առվով չհոսել այն դեպքից հետո, երբ թատրոնի տնօրենը որոշել է սառեցնել Ներսիսյանի բեմադրած «Քաջ Նազար»-ը՝ պատճառաբանելով, թե քաղաքական տարրեր կան դրանում:
Նախկին գեղղեկը, ըստ երույթին, չհերքեց մեր տեղեկությունն ու այսպես արձագանքեց. «No comment»:
Չնայած Սուրեն Շահվերդյանն «Ազգ»-ին հավատսիացրեց, որ թատրոնում մթոնոլորտը պրկված չէ, մութ սենյակում էլ պետք չէ կատուներ որսալ, այնուամենայիվ մեր աղբյուրը հավաստիացրեց՝ աշխատակիցները լարված են, բայց հրապարակային հիմնականում չեն ուզում խոսել: «Օրինակ, դերասաններից ու մյուս աշխատակիցներից շատերի սրտով չէր, որ որոշ ժամանակ առաջ Աննա Հակոբյանը հենց մեր՝ ռուսական թատրոնի բեմն էր ընտրել իր «էլեկտորատին» կրթելու համար»,- սրտնեղեց մեր զրուցակիցը:
ՍԵՎԱԿ ՎԱՐԴՈՒՄՅԱՆ
