Վարչապետ Նիկոլ Փաշինյանն օրերս Ազգային ժողովում հերթական անգամ հայտարարեց, որ Հայաստանը պատրաստ է ու անում է հնարավորը Ադրբեջանի հետ խաղաղություն հաստատելու համար: Երկրի առաջնորդն ընդգծեց, որ Հայաստանի համար կարեւոր է տարածքային ամբողջականության՝ 29.800 քառ/կմ-ի պահպանումը, եւ այդ համատեքստում՝ Երեւանը պատրաստ է ճանաչել Ադրբեջանի տարածքային ամբողջականությունը: Թե իրականում ի՞նչ նկատի ուներ Փաշինյանն՝ «Ադրբեջանի տարածքային ամբողջականության ճանաչում» ասելով, հասկանալի չէ: Տարօրինակ էր, որ հարցի պատասխանը նրա դեմ-դիմաց նստած ընդդիմադիրներն անգամ չփորձեցին ստանալ: Մինչեւ այս պահ էլ պետական որեւէ կառույցից կամ հենց կառավարական կաբինետից հստակեցնող պարզաբանում չի եղել, թե Փաշինյանի պատկերացրած «Ադրբեջանի տարածքային ամբողջականության մեջ» Արցախը մտնո՞ւմ է, թե՞ ոչ: Խիստ տարօրինակ էր նաեւ հարեւան երկրի նախագահ Իլհամ Ալիեւի՝ Փաշինյանի վերոնշյալ խոսքերից րոպեներ անց արած հայտարարությունն այն մասին, որ արցախցիները կա՛մ պետք է Ադրբեջանի քաղաքացիություն ընդունեն, կա՛մ բնակության այլ վայր փնտրեն:
«Ազգ»-ի հետ զրույցում ՀՀ Ազգային ժողովի նախկին պատգամավոր ու արդեն տեւական ժամանակ Արցախում հաստատված Սոֆյա Հովսեփյանը նշում է՝ Ալիեւի՝ նմանօրինակ հայտարարությունները նորություն չեն, ու, ցավոք, ապագայում նույնպես նա այդ բնույթի ճամարտակություններ էլի է անելու: Հովսեփյանի գնահատմամբ՝ Ալիեւի հայտարարությունը թե՛ միջազգային կառույցների թողտվության, թե՛ Հայաստանի իշխանության մտածված ու հանցավոր գործունեության հետեւանք է: «Եթե ուշադիր եք եղել, Փաշինյանն ու Ալիեւը սինքրոն են գործում, մեկի խոսքը փոխլրացնում է մյուսին: Արցախում Ալիեւի հայտարարությունները մարդկանց ընդհանուր տրամադրության վրա չեն ազդել, այստեղ հասկանում են, որ միմիայն իրենք են իրենց հողի ու երկրի պաշտպանը, ճակատագիր որոշողը, հետեւաբար պետք է անեն հնարավորը, որ ոսոխն իրենց տուն չմտնի: Այդ հայտարարություններից արցախցիներն ամենեւին չեն ընկճվել, ու չնայած ՀՀ իշխանությունների՝ արցախցուն կոտրելու համառ ջանքերի՝ այստեղ բնակվողները չեն ընկրկում»,- մեզ հետ զրույցում ներկայացնում է նախկին պատգամավորը:
Ինչ վերաբերում է անձամբ Փաշինյանի հայտարարություններին, ապա նրա երբեմնի թիմակիցը հիշեցնում է. «Փաշինյանը ժամանակին առաջարկում էր՝ «Արցախը տանք, պրծնենք», հիմա արդեն Հայաստանն է մաս-մաս տալիս: Այնպես որ, անգամ նրա ասածների մասին խոսելիս՝ նողկանք եմ ապրում»:
Արցախի Ազգային ժողովի «Արդարություն» խմբակցության պատգամավոր Մետաքսե Հակոբյանին Իլհամ Ալեւի հայտարարություններն արդեն վաղուց չեն զարմացնում: «Ազգ»-ի հետ զրույցում բացատրում է՝ վերջին 5 տարվա ընթացքում հայկական երկու պետությունների իշխանություններից հակահայ այնքան հայտարարություններ է լսել ու գոծողություններ տեսել, որ հակառակորդի հոխորտանքներն անգամ սուր չեն թվում: «Երբ քո երկրի պարտված ու պարտությունից դաս չքաղած իշխանություններն անգործունյա են ու բավարար կամք չունեն, ապա թշնամի երկրի նման պահվածքը նույնիսկ օրինաչափ է թվում: Արցախում մարդիկ, իհարկե, որոշակիորեն անհանգիստ են, գերլարված, որովհետեւ թշնամու հետ մենակ են մնացել, ու, ցավոք, առանց ինքնապաշտպանության հնարավորության: Սակայն մարդիկ այստեղ են՝ սեփական հայրենիքում ապրելու ամենօրյա պայքարի մտորումներով եւ հաստատակամությամբ»,- մանրամասնում է ընդդիմադիր պատգամավորը:
Հակոբյանն ուշադրություն է հրավիրում Նիկոլ Փաշինյանի՝ նախկինում արած երկու հայտարարություններին՝ հիշեցնելով, որ 2022 թ-ի ապրիլի 13-ին Ազգային ժողովի ամբիոնից ՀՀ վարչապետը հայտարարում էր, թե, իբր, «միջազգային հանրությունը պահանջում է իջեցնել Արցախյան հարցի նշաձողը»: 2023-ի ապրիլի 18-ին էլ վստահեցնում էր, թե նույն միջազգային հանրությունը «չի ընդունում Արցախի ինքնորոշման միջազգային իրավունքը»: «Այն, որ ՀՀ իշխանությունները օտարածին, ադրբեջանամետ, ապազգային ու հայատյաց են, դա ապացուցել են բազմիցս: Սակայն պետք է արձանագրել, որ Արցախի իշխանությունները, նախագահի՝ Արայիկ Հարությունյանի գլխավորությամբ, այդ հանցավոր խմբի անդամներն են ու իրենց հեզությամբ, ենթարկվելու պատրաստակամությամբ, մեծագույն չարիք են դարձել Արցախի Հանրապետության ու այստեղի ժողովրդի համար: Իսկ չարիքը չեն բուժում, դրանից ազատվում են»,- շեշտում է Հակոբյանը:
ՍԵՎԱԿ ՎԱՐԴՈՒՄՅԱՆ
