Ալեքսանդրիայում մեծարել են Նորա Արմանիին

Ալեքսանդրիայում (Եգիպտոս) հոկտեմբերի 5-ին կայացած 38-րդ միջազգային կինոփառատոնի բացման օրը, թատրոնի եւ կինոյի բազմաշնորհ դերասանուհի, կինոռեժիսոր, բեմադրիչ, SRFF կինոփառատոնի (Նյու Յորք) հիմնադիր Նորա Արմանին պարգեւատրվել է «Lifetime Achievement»` կյանքի ընթացքում ձեռք բերած նվաճումների համար սահմանված մրցանակով: Ըստ «Արմինյն Միրոր-Սփեքթեյթր» շաբաթաթերթի, արարողությունը տեղի է ունեցել Ալեքսանդրիայի նորակառույց գրադարանի շենքում` ի ներկայության եգիպտացի ճանաչված կինոաստղ եւ պրոդյուսեր Մահմուդ Հեմեդայի, որին էլ նվիրված է եղել փառատոնի այս տարվա միջոցառումը, մշակույթի փոխնախարար դոկտ. Խալեդ էլ Գալիլիի, փառատոնի տնօրեն, կինոքննադատ էլ-Ամիր Աբազայի, ինչպես նաեւ արաբ եւ օտար կինոգործիչների ու լրագրողների:

Հաջորդ օրը մամլո ասուլիսի ժամանակ Արմանին երախտագիտությամբ անդրադարձել է իր անցյալի գործունեությանը Եգիպտոսում եւ հիշատակել լուսահոգի դերասան Գամիլ Ռաբեթի, բեմարվետսի վարպետ Մոհամմեդ Սոբհիի եւ այլոց հետ իր համագործակցությունը: «Արմատներս աստեղ են, Եգիպտոսում: Շատ էի հավանում Ֆաթեհ Համամայի եւ Սոադ Հոսնիի դերակատարումները: Ուրախ կլինեի վերադառնալ եւ աշխատել Միջին Արեւելքի Հոլիվուդը հորջորջված այս երկրում, համատեղելով իմ աշխատանքները Մ. Նահանգներում, Ֆրանսիայում եւ Հայաստանում»,- ասել է նա: Բազմաթիվ հեռուստակայաններ եւ լրատվամիջոցներ լուսաբանել են մամուլի ասուլիսը: Արմանին նաեւ հոկտեմբերի 9-ին Ալեքսանդրիայի «Բորգ էլ Արաբ» կենտրոնում հանդիպել է Եգիպտոս-Ճապոնիա գիտատեխնիկական համալսարանի (E-JUST) ուսանողների եւ դասախոսական կազմի անդամների հետ, պատմել իր անցած կյանքի եւ արտիստական գործունեության մասին եւ պատասխանել ներկաների հարցերին:

Նորան, որ հայի մշտական ներկայությունն է վառ պահում աշխարհում իր որդեգրած Արմանի բեմական ազգանունով, ծնվել եւ մեծացել է Կահիրեում, ավարտել է Կահիրեհի Ամերիկյան համալսարանը, ապա մագիստրոսի երկու գիտական աստիճան է ստացել` մեկը արվեստագիտության բնագավառում Նյու Յորք Հանտեր քոլեջից (CUNY), իսկ մյուսը` սոցիոլոգիայի` Լոնդոնի LSE համալսարանից: Դերասանական ունակությունները զարգացրել է Արիան Մնուշկինի «Theatre du Soleil»-ում (Փարիզ) եւ Սիմոն Մկբըռնիի «Complicit Theatre»-ում (Լոնդոն): Տիրապետում է վեց լեզուների: Հանդես է եկել եւ դերեր կատարել կարճամետրաժ եւ լիամետրաժ մի շարք ֆիլմերում` «Նոր Եվան» (Կարին Վիարդի հետ), Միքայել Դովլաթյանի «Լաբիրինթոս» ֆիլմում (Սերժ Ավետիքյանի հետ), «Ձմեռ պապը. Բաղդադում», «Վերջնաժամկետը յոթ օրից», «Վերջին կանգառը» եւ այլ կինոնկարներում: Հեռուստատեսային դերակատարումներից կարելի է հիշաատակել «Ընկերները» (Եգիպտոս), «Սեւ ցուցակ: Հատուցումը» (NBC), «Դժբախտ պատահարը» (BBC) եւ «Ոսկե տղան» (CBS):

Վերջերս նա նկարահանումներ է կատարել ռեժիսոր Լեքսի Ալեքսանդրի Netflix-ի համար նկարահանված «Absolute Dominian» (Բացարձակ տիրապետում) գեղարվեստական ֆիլմի համար: Հետագա ծրագրերում ներառված են «Լաբիրինթոս» ֆիլմը ներկայացնել Փարիզում եւ թատերագետ, արվեստագիտության թեկնածու Անուշ Ասլիբեկյանի «Մերսեդեսը եւ Զարուհին» պիեսը` իր թարգմանությամբ անգլերեն լեզվով ներկայացնել 2023-ին կայանալիք UnitedSolo թատերական փառատոնի շրջանակներում:

ՀԱԿՈԲ ԾՈՒԼԻԿՅԱՆ