Ալեն Դելոնի վերջին դերը հայազգի կինոբեմադրիչ Սարիկ Անդրեասյանի ֆիլմում էր: Վերջինիս 2012-ին նկարահանած «Շնորհավոր նոր տարի, մայրիկներ» ֆիլմում ֆրանսիացի ճանաչված եւ սիրված դերասանը ինքն իրեն է խաղում», գրում է Հայկարամ Նահապետյանը «Արմինյն Միրոր-Սփեքթեյթըր» շաբաթաթերթի օգոստոսի 24-ի համարում:
Այդ ֆիլմում բժիշկը ֆրանսերենի ուսուցչուհու որդուն տեղեկացնում է, որ մայրը արագ զարգացող անողոք հիվանդությամբ է տառապում: Որդին էլ որոշում է մորը Փարիզ տանել արձակուրդն անցկացնելու: Ճանապարհորդությունը իրականում վերջին հրաժեշտն է դառնում ոչինչ չկասկածող մոր համար: Փարիզյան մի շքեղ ռեստորանում մայր ու որդի պատահմամբ հանդիպում են Ալեն Դելոնին, որն այդ ժամանակ 76 տարեկան էր: Ուսուցչուհու հետ պարելիս, Դելոնը ասում է. «Փարիզում ժամանակը ավելի արագ է անցնում, եւ ես փորձում եմ միշտ վայելել այս քաղաքում իմ կյանքի ամեն մի րոպեն»: Արժե հիշել այս խորհրդանշական արտահայտությունը մեծահամբավ դերասանի, որն օգոստոսի 18-ին, 88 տարեկանում վերջին հրաժեշտ տվեց երկրային իր կյանքին:
Հայաստանը պատմականորեն սերտ կապեր ունի Ֆրանսիայի հետ, ինչը նպաստել է, որ Հայաստանում եւ հայկական սփյուռքում ֆրանսիացի գրողներն ու դերասանները լայն ժողովրդականություն վայելեն: Դելոնը ինքը շատ մոտիկ է եղել աշխարհահռչակ շանսոնյե Շառլ Ազնավուրի հետ: 1963-ին 28-ամյա նորելուկ դերասանը խաղացել էր հայազգի կինոռժեիսոր Անրի Վերնոյի «Որեւէ թիվ կարող է շահել» ֆիլմում, այնուհետեւ 1969-ին նույն ռեժիսորի «Սիցիլիական կլանը» ֆիլմում: «Լը Մոնդ» ֆրանսիական հայտնի պարբերականը Դելոնի մահախոսականի հոդվածին կից տեղադրել էր նաեւ Վերնոյի հետ Դելոնի լուսանկարը: 1980-ին ֆրանսիացի եւ շվեյցարացի գործընկերների համագործակցությամբ խորհրդային կինոգործիչները նկարահանեցին «Թեհրան-43» ֆիլմը, որ պատմում է երեք պետությունների ղեկավարներին սպանելու նացիստական Գերմանիայի մտադրության մասին: Դելոնը այդ ֆիլմում ֆրանսիացի դեդեկտիվի դերն էր կատարում: Ֆիլմի երաժշտությունը Ջորջ Կառվարենցինն է, իսկ Շառլ Ազնավուրի «Une Vie d Amour» (Սիրո մի ամբողջ կյանք) երգը վարակեց ամբողջ աշխարհը իր գեղեցկությամբ:
Դելոնը Հայաստան է այցելել 2012-ի դեկտեմբերին, մասնակցելու Անդրեասյանի «Շնորհավոր նոր տարի, մայրիկներ» ֆիլմի ցուցադրությանը: Այդ ժամանակ նա հանդիպեց ՀՀ նախագահ Սերժ Սարգսյանի եւ Ն.Ս.Օ.Տ.Տ. Գարեգին Բ. Ամենայն Հայոց կաթողիկոսի հետ: Դելոնն այդ ժամանակ լրագրողներին ասել էր. «Համաձայնեցի նկարահանվել այդ ֆիլմում, որովհետեւ մոր հանդեպ սերը հիանալի թեմա է»: Հայաստանում գտնվելու օրերին նա այցելեց Ծիծեռնակաբերդի Հայոց ցեղասպանության հուշահամալիրը: Նա հատուկ վերաբերմունք ուներ Հայաստանի ու հայերի նկատմամբ եւ հետաքրքրվել էր, թե ինչո՞ւ «իմ սիրելի ընկեր Ազնավուրը ինձ չէր ասել, որ ես այդքան մեծ ժողովրդականություն եմ վայելում Հայաստանում»:
Թարգմանեց՝ ՀԱԿՈԲ ԾՈՒԼԻԿՅԱՆԸ
