«Քվորում չկա»-ով վերահաստատված թրքասիրություն

ՀՀ Ազգային ժողովը, ավելի ճիշտ՝ մեծամասնություն կազմող «Քաղաքացիական պայմանագիր» խմբակցությունը, համաձայն է 2021 թվականի հունիսի 15-ին օկուպացված Շուշիում Ալիեւի ու Էրդողանի ստորագրած «Շուշիի հռչակագրի» վավերացմանը: Այլապես իշխանական պատգամավորները կընդունեին ընդդիմադիր պատգամավորների առաջարկն ու գոնե կներկայանային փետրվարի 23-ի ԱԺ  արտահերթ նիստին, որի օրակարգում էր «Հայաստան» խմբակցության առաջարկած Ազգային ժողովի հայտարարության նախագիծը՝ Ադրբեջանի եւ Թուրքիայի խորհրդարանների կողմից «Շուշիի հռչակագրի» վավերացման կապակցությամբ:

Նշենք, որ ԱԺ «Հայաստան» խմբակցությունը հանդես էր եկել նախաձեռնությամբ եւ շրջանառության մեջ էր դրել հայտարարության տեքստ,որը պետք է դառնար ԱԺ նախագիծ: Այդ հայտարարությամբ ՀՀ խորհրդարանը պետք է  քննարկումներ ծավալեր, իր գնահատականը տար «Շուշիի հռչակագրի» վավերացման վերաբերյալ: Ինչպես եւ սպասելի էր, փետրվարի 21-ին  ԱԺ Արտաքին հարաբերությունների հանձնաժողովում քպականները  մերժեցին  Շուշիի հռչակագրի վավերացումը դատապարտող հայտարարության նախագիծը:

Չներկայանալով փետրվարի 23-ի ԱԺ արտահերթ նիստին՝ իշխող ուժն արտահայտեց իր առաջնորդի դիրքորոշումը: Որպես ժողովրդի մանդատը ստացած պատգամավորներ՝ իրենք, միեւնույն է, ունեն մեկ բերան ու մեկ ականջ: Ականջն ու բերանը սպասարկում են թուրք-ադրբեջանական շահերը, չունեն  պետական, ազգային մտածելակերպ, չունեն ազգային արժանապատվություն, պատրաստ են լսել իրենց տերերի հրահանգները, դրանք բառացի հայտարարել Հայաստանի ամենաբարձր ամբիոններից ու  բռնաճնշումներով չեզոքացնել ամեն մի ընդվզում, որը կարող է խոչընդոտել Հայաստանը օտարահպատակ դարձնելու իրենց մեծ ծրագրին:

Ըստ էության, «Շուշիի հռչակագիրը» ռազմաքաղաքական համաձայնագիր է, որով Թուրքիան ու Ադրբեջանն ամրացնում, մեկտեղում  են իրենց ուժերը եւ ավելի նպատակային գործում՝ Արցախը լիովին ադրբեջանացնելու, Սյունիքով երկու եղբայրական պետություններն իրար կապելու, Հայաստանի ինքնիշխան տարածքը վերաձեւելու, Արցախի ժողովրդի ինքնորոշման իրավունքն անտեսելու, Հայոց ցեղասպանության՝ հայկական պահանջատիրությունը ոչնչացնելու նպատակով:

Նշանակում է՝ ԱԺ իշխող ուժը, իսկ ավելի ճիշտ՝ Փաշինյանն էլ 3-րդ ստորագրությունն է դրել «Շուշիի հռչակագրի» տակ, Ալիեւի ու Էրդողանի ստորագրությունների ներքեւի հատվածում:

Քպականներն անգամ վախեցել են նիստին ներկայանալ ու լսել ընդդիմադիրների՝ Ադրբեջանի ու Թուրքիայի հասցեին քննադատական ելույթները: Վախեցել են Հայաստանի ու Արցախի անվտանգության,  Հայոց ցեղասպանության ճանաչման, Սյունիքի պաշտպանության մասին անգամ մի խոսք ասել: Այդ վախերից արդեն գարշահոտ է փչում: 

Է՞լ ինչից եք վախենում, իշխանությունը կորցնելո՞ւց, երբ ռազմագերիների հարցը փակեցիք,  Արցախի կարգավիճակի հարցը լուծեցիք, Սյունիքը նվիրեցիք թշնամուն, Հայոց ցեղասպանության ճանաչման վրա խաչ քաշեցիք: Ձեր ԿԳՄՍ նախարարը հայտարարում է, թե Արցախի հայկական ժառանգությունը հայազրկելու դեմ ոչինչ չեն կարող անել. մանդատը միայն ՅՈՒՆԵՍԿՕ-ն ունի: Եվ սա դեռ ցածր օղակներից մեկի դիրքորոշումն է, ինչքան բարձր՝ այնքան անողնաշար ու սողացող:  Պատմության մեջ կմնա «Հայաստան» խմբակցության ընդամենը մի գրավոր հայտարարություն՝ ընդդեմ «Շուշիի հռչակագրի» վավերացման, այսինքն՝ Արցախի ու Հայաստանի պետականության, ֆիզիկական գոյության սպառնալիքների եւ այդ սպառնալիքները ողջունող Փաշինյանի ղեկավարած իշխանության թրքահաճո բացակայության վավերացումը  ԱԺ-ի լուսատախտակին՝ ՔՎՈՐՈՒՄ ՉԿԱ:

ՆԱԻՐ ՅԱՆ