Գերմանալեզու ԶԼՄ-ներն անդրադառնալով Երեւանում նոյեմբերի 23-ին գումարված ՀԱՊԿ-ի ժողովին, դրան Պուտինի մասնակցությանը, նկատել են տալիս, որ Հայաստանը, դաշինքից աջակցություն չստանալով, Ադրբեջանի դեմ հակամարտության մեջ մենակ է մնացել, կարճ ձեւակերպմամբ՝ Պուտինից լքված, եթե չասենք՝ դավաճանված։ Եթե Հայաստանի բնակիչների մեծ մասի ցանկությամբ լիներ, ՌԴ-ի առաջնորդությամբ ղեկավարվող պաշտպանական կառույցի գագաթնաժողովը Երեւանում չէր գումարվի, կարծիք է հայտնում գերմանական հեռուստատեսության առաջին ալիքի մեկնաբան Զիլվիա Շթյոբերը՝ շարունակելով, թե Պուտինին ոչ թե բուռն ուրախությամբ, այլ՝ ատամների կրճտոցով են դիմավորել։ Ադրբեջանի նախագահը նույնիսկ հեգնել է, որ իր երկիրն «այդ կազմակերպության անդամ չլինելով այնտեղ ավելի շատ բարեկամ ունի, քան Հայաստանը»։ Փաշինյանը չի հաջողել ՀԱՊԿ անդամ երկրներին Ադրբեջանի դեմ միավորել, գրում է Շթյոբերն իր ծավալուն վերլուծականում։
Հայաստանը 2020-ի պատերազմից հետո պարտվողի դիրքերում է, որ ուժ է ստանում սփյուռքի հայերից։ Ուկրաինայի պատերազմի սկզբից ՌԴ-ից արտագաղթի շնորհիվ Հայաստանում շահում է ՏՏ ոլորտը, ծրագիր կա հզոր անօդաչուներ կառուցել, ընդգծում է Շթյոբերը։
ԱՆԱՀԻՏ ՀՈՎՍԵՓՅԱՆ
