Խրոխտ ու խորուն հայացք է փորձում ձգել պատմության երբեմնի ուուսցիչն ու առավել քան բրուտալ երեւալ: Պաշտպանության նախարար է, հասկանալի է, հնարավորինս լուրջ կերպարանքով պետք է հասարակությանը երեւա, ցույց տա, թե իր մի սաստող հայացքից շարքային զինծառայողից մինչեւ բարձրաստիճան սպա քարանում, ձգվում է: Սուրեն Պապիկյանն օրերս զորամասերից մեկն է այցելել՝ գրեթե սպորտային հագուկապով: Ճիշտ է՝ զինվորական համազգեստի գույների մոտիվներով է զգեստը ընտրել, բայց ազատ ոճի տաբատն ու շապիկը մատնում ու բոլորովին այլ տրամադրություն են փոխանցում: Նախարարության տարածած լուսանկարներից երեւում է՝ նախարարի պաշտոնը ստանձնելուց հետո լոռեցի (լոռեցիներին, ի դեպ, միամիտ են անվանում) նախարարը նկատելիորեն գիրացել է:
Ժամանակին Facebook սոցիալական ցանցում ծիծաղաշարժ մի տեսանյութ կար, որտեղ երեխան մորը կատակով ասում էր. «Թու-թու-թու, լցվե՛լ ես»: Ի պատասխան մայրը մի քանի ապտակ է հասցնում ու արձագանքում. «Թաղեմ քեզ»:
Հուսանք՝ պաշտպանության նախարարը մեր դիտարկման համար մեզ «չի թաղի» ու ի գիտություն կընդունի, որ պաշտպանության նախարարն ազատ ոճի, կիսասպորտային շապիկով զորամասեր չպետք է այցելի: Ըստ Պապիկյանի ներկայացրած հայտարարգրի՝ ոչ միայն ինքը, այլ նաեւ միջոցներն են «լցվել»: Պաշտոնի անցնելուց հետո հասցրել է անշարժ գույք, թանկարժեք ավտոմեքենա ձեռք բերել, դե իսկ 44-օրյա աղետալի պատերազմից հետո նրա կազմակերպած գերթանկարժեք հարսանյաց արարողության մասին ավելի լավ է՝ լռենք: Թե նրա նշանակումից ի վեր ինչ է փոխվել բանակում, ինչքանով են վերակազմավորվել զինված ուժերը, բոլորին է տեսանելի անգամ անզեն աչքով, ու դա, ցավոք, դրական տեղաշարժի մասին չի խոսում:
ՍԵՎԱԿ ՎԱՐԴՈՒՄՅԱՆ
