Ազգային ժողովի բոլոր պատագամվորները մեկ տարի ութ ամիս է, ինչ բացի բուն աշխատավարձն ու պարգեւավճարները՝ նաեւ հավելավճար են ստանում: 2021-ի խորհրդարանական արտահերթ ընտրություններից առաջ դեռեւս նախորդ՝ 7-րդ գումարման Ազգային ժողովի իշխանական խմբակցությունը՝ «Իմ քայլը», օրենսդրական նախաձեռնությամբ էր հանդես եկել, որով առաջարկում էր պատգամավորներին տրվող ամենամսյա գումարի չափը 50 հազարից 250 հազար դարձնել: Առաջարկն իմքայլականներն ընդունել էին, ու պատգամավորներն առ այսօր հնգապատիկ ավելի, այսպես ասած, գրպանի գումար են ստանում: Այս գումարը, իբրեւ թե, նախատեսված է պատգամավորների տարատեսակ այցերի կազմակերպման համար: Օրինակ՝ մարզեր մեկնելու ժամանակ մեքենան լիցքավորելու կամ հարակից այլ ծախսերի համար:
Երբ օրենսդրական փաթեթը խորհրդարանը նոր էր ընդունել, այսօրվա ընդդիմադիրների գրեթե մեծամասնությունը, որ դեռեւս պատգամավորական մանդատ չէր ստացել, հայտարարություն էր անում ու խոստանում, որ խորհրդարան գործուղվելուց հետո իրենց առաջին քայլն այդ գումարներից հրաժարվելն ու օրենքի հետկանչման պահանջով նախաձեռնությամբ հանդես գալը պետք է լինի: «Ազգ»ի Ազգային ժողովին ուղղված հարցումից հետո պարզ դարձավ, որ ընդդիմադիրներն առ այսօր ստացել ու շարունակում են ստանալ 250 հազարական հավելավճարները: «Առ այս, ԱԺ-ում ներկայացված երեք խմբակցություններից եւ ոչ մեկը 250 հազար դրամ հավելավճչարից չի հրաժարվել»,- «Ազգ»-ին ասացին ԱԺ հասարակության հետ կապերի եւ հաղորդակցության վարչությունից:
Պատգամավորները, որ, ակնհայտ է, մարզեր մեկնելու ու իրենց ընտրողների հետ հանդիպման ջատագովը չեն, լրացուցիչ այդ գումարից չեն հրաժարվում՝ «ավել թիքեն փոր չի ծակի» սկզբունքից ելնելով: Եվ եթե իշխանական պատգամավորների դեպքում, ինչ-որ առումով, հասկանալի է՝ ինչու չեն հրաժարվում այս գումարից (վաղուց է հայտնի, որ «հեղափոխական» երեսփոխականները պարգեւավճարների կամ հավելավճարների սիրահար են), ապա ընդդիմադիր պատգամավորների դեպքում 250 հազար դրամը գրպանելը ժողովրդական մեկ այլ խոսքի արտացոլումն է՝ «չեմ ուզում, գրպանս դիր»:
Երբ դեռ նոր էր օրենքը ընդունվել, Facebook սոցիալական ցանցի իմ էջում գրառում էի կատարել՝ նշելով, որ ընդդիմադիրները պարզապես պարտավոր են հետ կանչել այս օրենքը: Գրառման ներքո «Հայաստան» խմբակցության պատգամավոր, դաշնակցական Գեղամ Մանուկյանն ինձ՝ «իրենց հասցեին անեծքներ տեղալու» մեջ էր մեղադրել՝ հորդորելով՝ սպասել մինչեւ օոգոստոսի 2-ը (այդ օրն 8-րդ գումարման խորհրդարանն անդրանիկ նիստն էր գումարելու):
2021-ի հուլիսի 27-ին էլ նույն խմբակցության պատգամավոր, ԱԺ նախկին փոխխոսնակ ու ՀՅԴ Գերագույն մարմնի ղեկավար Իշխան Սաղաթալյանը հայտարարել էր, թե «Հայաստան» դաշինքը հանդես կգա պատգամավորներին 250 հազար դրամ լրավճար տալու օրենքը հետ կանչելու նախաձեռնությամբ: Բայց փաստն այն է, որ թե՛ 2021-ի օգոստոսի 2-ից առ այսօր «Հայաստան» դաշինքը նման նախաձեռնությամբ ոչ միայն հանդես չի եկել, այլեւ մեծագույն սիրով օգտվել ու շարունակում է օգտվել իշխանության ընծայած գրպանի գումարից: Ի դեպ, տեղեկացանք, որ հավելավճարից նաեւ 8-րդ գումարման՝ արդեն մանդատից հրաժարված պատգամավորները չեն հրաժարվել:
ՍԵՎԱԿ ՎԱՐԴՈՒՄՅԱՆ
