Նոյեմբերի 24-ին Լատվիայի համալսարանի (Ռիգա) փոքր դահլիճում կայացաւ գիտաժողով՝ նուիրուած Սուրբ Ներսէս Շնորհալու մահուան 850-ամեակին: Այն կազմակերպել էր Բալթեան երկրների հայոց թեմը (առաջնորդ` Տ. Վարդան եպիսկոպոս Նաւասարդեան) Լատվիայի համալսարանի աստուածաբանութեան բաժանմունքի հետ համատեղ՝ Հայաստանից, Չեխիայից, Ֆրանսիայից, ԱՄՆ-ից, Թուրքիայից եւ Լատվիայից հայագէտների եւ դասախօսների մասնակցութեամբ: Գիտաժողովին զեկուցումներով հանդէս են եկել Թուրքիայի կաթոլիկ հայերի պատրիարք Պօղոս-Լեւոն Զէքիեանը («Սուրբ Ներսէս Շնորհալին որպէս եզակի կերպար քրիստոնէական մտքի եւ պրակտիկայի մէջ. Շնորհալիի՝ քրիստոնէական էկումենիզմի ռահվիրայական տեսլականը»), Փարիզի համալսարանից դոկտոր Կլոդ-Արմէն Մութաֆեանը («Մլեհ, մի յաջողակ հայ իշխան (1169-1175)»), Լատվիայի համալսարանից աստուածաբանութեան դոկտոր Անդրիս Պրիեդը («Հայ վանականութեան մարգինալ ձեւերը 13-րդ դարում»), լատվիացի հայագէտ դոկտոր Վալդա Սալմինեան («Սուրբ Ներսէս Շնորհալու «Ողբ Եդեսիոյ» պատմական պոեմը»), Էջմիածնի «Գարեգին Ա գիտահետազոտական կենտրոնից» Վահան Ս. եպիսկոպոս Յովհաննիսեանը («Սուրբ Ներսէս Շնորհալուն վերագրուող չորս Աւետարանների վերլուծութիւնը»), Նիւ Եորքի Սուրբ Ներսէս հայկական ճեմարանի պատուաւոր պրոֆեսոր Աբրահամ Տէրեանը («Շնորհալու մեկնաբանութիւնը երանութիւնների մասին»), Լատվիայի համալսարանից աստուածաբանութեան թեկնածու Էլիզաբեթէ Տայվանէն («Սուրբ Ներսէս Շնորհալու քրիստոսաբանութիւնը Արեւելքի եւ Արեւմուտքի խաչմերուկում. ուսանելի մանրամասներ»), Լատվիայի արուեստների ակադեմիայից արուեստաբանութեան դոկտոր Օյար Սպարիտիսը («Հայեացք Կենտրոնական Հայաստանի հոգեւոր ճարտարապետութեանը»), Լիսաբոնի Նոր համալսարանից Հայկ Իւթիճեանը («Ներսէս Շնորհալու երկերի երաժշտութիւնը. մարտահրաւէրներ եւ արդիւնքներ») եւ Մատենադարանից արուեստագիտութեան թեկնածու Արուսեակ Թամրազեանը («Միստիկ խորհրդաբանութիւնը մելիզմատիկ երգեցողութեամբ. Սուրբ Ներսէս Շնորհալու տաղերը»):
Գիտաժողովի առթիւ Աստվածաբանութեան բաժանմունքի գրադարանում կազմակերպուել է կիլիկեան մանրանկարչութեան ցուցադրութիւն:
Երեւանում, Փարիզում եւ Ռիգայում Ներսէս Շնորհալուն նուիրուած միջազգային գիտաժողովներին յաջորդելու է եւս մէկ շնորհալիական գիտաժողով Հռոմում՝ նոյեմբերի 30-ից դեկտեմբերի 1-ը:
Ա. Բ.
Լուսանկարում՝ Գիտաժողովի մասնակիցներից մի քանիսը:
