Օսմանյան պատմության էդինբուրգյան ուսումնասիրությունների շրջանակներում (գլխ. խմբագիր` Քենտ Ֆ. Շուլ` Բինգհամտոն համալսարանից), Էդինբուրգի համալսարանի հրատարակչությունը վերջերս լույս է ընծայել դոկտ. Մեհմետ Պոլատելի «Armenians and Land Disputes in the Ottoman Empire, 1850-1914» խորագրով գիրքը, որն անգլերեն լեզվով եզակի հետազոտություն է` նվիրված Հայկական հարցի առաջացմանն ու հայկական հողային տարածքների քննարկումներին (19-րդ դարի կեսերից մինչեւ Ա. Աշխարհամարտի բռնկումը) եւ դրանց հետեւանքում բխած միջհամայնքային հարաբերությունների վատթարացմանն ու զանգվածային բռնություններին:
Հեղինակը` դոկտ. Մեհմետ Պոլատելը, Ստամբուլում Հրանտ Դինքի հիմնադրամում փոքրամասնությունների իրավունքների պաշտպանման ակադեմիայի համադրող-փորձագետ է: Դոկտորական է պաշտպանել Օսմանյան կայսրությունում հայոց հողային հարցերի առաջացմանն ու ձեւափոխումների թեմայի շուրջ Ստամբուլի Բողազիչի համալսարանում: Այնուհետեւ Մ. Նահանգներում Միչիգանի Էն Արբոր համալսարանում շարունակել է հետդոկտորական հետազոտությունները` արժանանալով Ալեք Մանուկյան կրթաթոշակին: 2019-20 թթ. աշխատակցել է նաեւ Ցեղասպանության բարձրագույն ուսումնասիրությունների «USC Shoah Foundation» կենտրոնում: Նրա հետաքրքրասիրությունների ոլորտը բավական լայն է, սկսած պետություն-հասարակություն հարաբերություններից, ունեցվածքի քաղաքականությունից ու մշակութային ժառանգությունից մինչեւ ունեզրկում եւ Հայոց ցեղասպանություն: Ուգյուր Ունգյորի համահեղինակությամբ 2011-ին հրատարակել է «Confiscation and Destruction. Young Turk Seizure of Armenian Properties» (Բռնագրավում եւ քանդում: Հայկական կալվածների զավթումը երիտթուրքերի կողմից» հատորը:
Պատրաստեց` ՀԱԿՈԲ ԾՈՒԼԻԿՅԱՆԸ
(The Armenian Mirror-Spectator)
