Իտալիայի Բարբրինո դի Մուջելո քաղաքի Կորսինի թատրոնում հունվարի 20-ից 29-ը ներկայացվել է «Կարո. հայկական պատմություն» թատերախաղը: Գործողությունները կատարվում են 1915 թվականին, հայկական Շեւան գյուղում, որտեղ, ինչպես հարեւան բնակավայրերում, ուրվագծվում է երիտասարդ թուրքերի իշխանության խելագար սպառնալիքը, որը հանգեցնում է ամենասարսափելի հանցագործության՝ ցեղասպանության ծրագրմանն ու իրականացմանը: «Կարոյի» գլխավոր հերոսը երիտասարդ Կարապետ Սյուրմելյանն է, որի ընտանիքի կյանքը լեռնային փոքրիկ գյուղում հոսում է ժամանակի եւ հնագույն ազգային ծեսերի հետ, մինչեւ որ պայթում է Մեծ աղետը…
Թատերախաղի հեղինակը եւ բեմադրիչը Ջուզեպպե դի Բելլոն է՝ թատերագիր, երաժիշտ եւ բեմադրիչ, Կարոյի դերակատարը՝ Ստեֆանո Պանցերին: Վերջինս Վենետիկի Կառլո Գոլդոնիի թատրոնի դերասան է, որ թատերական լայն գործունեություն է ծավալել Իտալիայում եւ նրա սահմաններից դուրս:
Ա. Բ.
