Համագործակցում են գիտնականները

12

2022թ.  հունիսի 16-17-ին Բիշքեկում` Ղրղզստանի Գիտությունների ազգային ակադեմիայում  տեղի ունեցավ Անկախ պետությունների համագործակցության (ԱՊՀ) երկրների գիտնականների չորրորդ համաժողովը:

Մասնավորապես, ՀՀ ԳԱԱ Մանուկ Աբեղյանի անվան գրականության ինստիտուտի տնօրեն Վարդան Դեւրիկյանի զեկուցումը  նվիրված էր «Մետաքսի ճանապարհի երկրները եւ բնակավայրերը հայկական սկզբնաղբյուրներում» թեմային:

Ղրղզստանի Գիտությունների ազգային ակադեմիայի պատմության, ազգագրության եւ ազգաբանության ինստիտուտի հետ պայմանավորվածություն ձեռք բերվեց կնքել համագործակցության հուշագիր: Նպատակն է Մետաքսի ճանապարհի Միջին Ասիայի բնակավայրերի մասին հայկական սկզբնաղբյուրներում եղած տեղեկությունների բնագրերի հրատարակումը:

Համաժողովի շրջանակում անցկացվեց ԱՊՀ երկրների երիտասարդ գիտնականների կլոր-սեղան՝ «Երիտասարդությունը եւ գիտությունը. Հիմնախնդիրները եւ հեռանկարները» թեմայով: ԱՊՀ երկրների երիտասարդ գիտնականների համաժողովը Ռուսաստանի Գիտությունների ակադեմիայի 300-ամյակի հանդիսությունների շրջանակներում տեղի կունենա 2023թ-ին:

ԱՊՀ երկրների հիմնարար գիտության ոլորտում համագործակցության խորհրդի 10-րդ նիստի ժամանակ խորհրդի նախագահ 2023 թ-ի համար ընտրվեց ՀՀ ԳԱԱ նախագահ, ակադեմիկոս Աշոտ Սաղյանը: Խորհրդի քարտուղարության ղեկավար ընտրվեց ՀՀ ԳԱԱ ակադեմիկոս-քարտուղար Արթուր Իշխանյանը: ԱՊՀ երկրների հիմնարար գիտության ոլորտում համագործակցության խորհրդի հաջորդ նիստը կանցկացվի 2023 թ-ին, Երեւանում:

Ստ. ՊԱՊԻԿՅԱՆ