2023 թ. սեպտեմբերի 11-ին ՀՀ Գիտությունների ազգային ակադեմիայի նախագահ Աշոտ Սաղյանը եւ Չինաստանի Գիտությունների ակադեմիայի փոխնախագահ Չժան Յապինը ստորագրեցին համագործակցության հուշագիր:
Մեր ակադեմիայում ստորագրված հուշագրի նպատակն է ամրապնդել եւ զարգացնել երկու երկրների համագործակցությունը գիտության՝ մասնավորապես ֆիզիկայի եւ աստղաֆիզիկայի, էկոլոգիայի, քիմիայի, կենսաբանության ու երկրաբանության ոլորտներում: Ըստ հուշագրի, ՀՀ Գիտությունների ազգային ակադեմիան եւ Չինաստանի Գիտությունների ակադեմիան կզարգացնեն համագործակցությունը համատեղ հետազոտական նախագծերի իրականացման, գիտաշխատողների փոխանակման, գիտական հանդիպումներին մասնակցելու եւ համատեղ գիտաժողովներ ու սեմինարներ անցկացնելու, տեղեկատվության եւ գիտական հրապարակումների փոխանակման միջոցով:
Չժան Յապինը շնորհավորեց ՀՀ ԳԱԱ նախագահ, ակադեմիկոս Աշոտ Սաղյանին եւ ՀՀ ԳԱԱ նախագահության անդամներին ՀՀ ԳԱԱ-ի 80-ամյա հոբելյանի կապակցությամբ:
Չինաստանի Գիտությունների ակադեմիան հիմնադրվել է 1949թ: Այն առաջատար խորհրդատվական կենտրոն է Չինաստանի կառավարության համար եւ համալիր կենտրոն բնական գիտությունների բոլոր ուղղությունների ու բարձր տեխնոլոգիաների հետազոտությունների համար: Ակադեմիան ունի 6 բաժանմունք, 106 ինստիտուտ եւ բարձրագույն կրթական 3 հաստատություն, 60 հազար գիտաշխատող եւ կառավարող մարմնի ներկայացուցիչ, ավելի քան 800 ակադեմիկոս, 126 արտասահմանյան անդամ աշխարհի ավելի քան 20 երկրներից:
Չինաստանի Գիտությունների ակադեմիան կառավարում է Չինաստանի գիտական ենթակառուցվածքների մեծ մասը: Այդ խոշոր գիտական ենթակառուցվածքները բաց են օտարերկրյա գիտնականների համար:
ՍՏԵՓԱՆ ՊԱՊԻԿՅԱՆ
