Վերջերս Ռուսաստանի Դաշնության Դուբնա քաղաքում ՀՀ Գիտությունների ազգային ակադեմիայի եւ Միջուկային հետազոտությունների միացյալ ինստիտուտի (ՄՀՄԻ) միջեւ կնքվեց համաձայնագիր հիմնարար գիտության, տեղեկատվական տեխնոլոգիաների, նորարարության եւ կրթության ոլորտում համագործակցության վերաբերյալ:
Համաձայնագրով նախատեսվում է հիմնել Միջուկային հետազոտությունների միացյալ ինստիտուտի եւ ՀՀ Գիտությունների ազգային ակադեմիայի համատեղ հետազոտական կառույց` ՀՀ գիտահետազոտական ինստիտուտների եւ ՄՀՄԻ-ի գիտնականների ու մասնագետների փոխգործակցությունը պահպանելու, գիտատեխնիկական բնագավառում, ինչպես նաեւ կադրերի պատրաստման ու բնագիտության հանրայնացման ոլորտում համագործակցությունը խորացնելու նպատակով:
Հիմնական հետազոտական ուղղություններն են տեսական ու փորձարարական ֆիզիկան, աստղաֆիզիկական հետազոտությունները, մոդելավորումն ու տվյալների մշակումը, միջուկային ֆիզիկայի մեթոդները որոնողական հետազոտություններում, առաջատար հետազոտությունները նոր նյութերի քիմիայի ոլորտում, կենսաբանական հետազոտությունները, ներառյալ ռադիոկենսաբանական երեւույթների մոլեկուլային մեխանիզմների ուսումնասիրությունն ու տրեկային մեմբրաների մոդիֆիկացիան, երկրաֆիզիկան ու սեյսմոլոգիան, տեղեկատվական տեխնոլոգիաները: Նախատեսվում է նաեւ իրականացնել համատեղ մագիստրոսական ու ասպիրանտական ծրագրեր, նախագծերի ու գիտական հետազոտությունների արդյունքների փորձաքննություն:
ՍՏԵՓԱՆ ՊԱՊԻԿՅԱՆ
