ԳԴՀ կանցլեր Շոլցը Դավոսում Հայաստանին հուշեց բանաձեւը
Մայիսի 22-26- ին շվեցարական Դավոսում կայացած համաշխարհային տնտեսական ֆորումի գլխավոր նյութը, ինչպես ենթադրվում էր, ռուս- ուկրաինական 92 օր առաջ սկսված ռազմական գործողություններն են։ Գերմանական ԶԼՄ-ների ուշադրության առանցքում մայիսի 24-ին Ջորջ Սորոսի, վերջին օրը՝ մայիսի 26-ին՝ կանցլեր Օլաֆ Շոլցի հատու ելույթներն են։ Պատկերացրեք, թե մթնոլորտն որքան հեղձուկ է դառնում, երբ Եվրոպայում Համբարձման տոնի ոչաշխատանքային հինգշաբթի օրվա լրահոսում ավելանում է Կադիրովի՝ Լեհաստանին ուղղված լուրջ սպառնալիքը։ Չեչնիայի ղեկավար Ռամզան Կադիրովը, որին գերմանացիները Պուտինի «արյունարբու շուն» անունն են տալիս իր առանձնակի դաժան գործողությունները շեշտելով, երեկ վաղ առավոտյան «Թելեգրամով» հաղորդել է, թե «Ուկրաինայի հարցը փակված է։ Ինձ առավել շատ Լեհաստանն է հետաքրքրում։ Հրամանի դեպքում 6 վայրկյանում ցույց կտանք»։
Քիչ ավելի ուշ Ուկրաինայի պաշտպանության փոխնախարարն է իրազեկում, թե բելառուսական Բրեստում Ռուսաստանը «Իսկանդեր» հրթիռներ է տեղադրել՝ Ուկրաինայի արեւմուտք հասնելու նպատակով, իսկ Զելենսկու խորհրդականը պարզաբանում է, որ Դոնբասում ուկրաինացիները կորցնում են արագությունը, ռուսական բանակը վարպետորեն մեջտեղ է հանում կուտակած ռեզերվը, իսկ հասարակությունն այժմ ավելի է պառակտվում ՝ ի տարբերություն պատերազմի առաջին շաբաթների։
Ամերիկացի միլիարդատեր Ջորջ Սորոսը երեքշաբթի Դավոսում զգուշացրեց, թե «աշխարհին սպառնում է «երրորդ համաշխարհայինը», իսկ Ուկրաինայում պատերազմը վերջ կդնի քաղաքակրթությանը։ Ուստի պիտի համախմբենք ուժերը պատերազմը շուտափույթ ավարտելու, իսկ քաղաքակրթությունը փրկելու լավագույն եւ երեւի միակ ուղին Պուտինին հնարավորինս արագ հաղթելն է»։ Սորոսը գնահատեց ԱՄՆ-ի եւ Եվրոպայի սատարումն Ուկրաինային, սուր քննադատեց Գերմանիային։
Ահա այս լարված լրամիջավայրում պիտի ըմբռնել ԳԴՀ կանցլեր Շոլցի խոսքը, որ աշխարհի բոլոր մարդկանց ուղեղներին հասանելի շեշտն ընտրեց։ Նա, շարադրելով ապագայի հանդեպ իր անձնական մտահոգությունները, զգուշացրեց՝ «եթե արագ, առանց հապաղելու, վճռական հակաքայլեր չանենք, մեզ սպառնում է վերջին տասնամյակների ամենամեծ համաշխարհային սովը»։
Գերմանիայի խանութներում դժվար է արեւածաղկի, եգիպտացորենի, ռապսի (զարմանալի է, բայց վառ դեղին ծաղիկներով այդ բույսի հայերեն տարբերակը, ըստ Վիկիպեդիայի՝ սեւուկ է-Ան.Հ.) ձեթ գտնել, եթե բախտ է վիճակվում, ապա արեւածաղկի մեկ լիտրի ամենաէժան գինը 5 եվրո է։ Հաճախ դատարկ են նաեւ բրնձի, մակարոնեղենի դարակները, եւ սահմանափակում կա՝ գնելու դեպքում. 3 տուփից ավելի արտոնված չէ։ Ըստ գերմանական աղբյուրների, Ուկրաինան համաշխարհային շուկայում վերոնշյալ ձեթերի խոշորագույն արտահանողն է, ցորենի, գարու, եգիպտացորենի 14 տոկոսի մատակարարը։ Խանութներում գերմանացիները տեսնում են կանցլերի խոսքի իրական վտանգը, ուստի աներկբա հավատում են նրա ելույթի մյուս շեշտադրումներին։ Ստորեւ՝ դրանք։
Թվում է Ռուսաստանի՝ ողջ Ուկրաինան գրավելու ցանկությունն այսօր ավելի հեռու է, քան պատերազմի սկզբում էր, ասաց կանցլերը։ ՆԱՏՕ-ի, ԵՄ-ի, Մեծ 7-նյակի վճռականությունը թերագնահատել էր Պուտինը, իսկ նպատակն այն է, որ «Պուտինն իրավունք չունի հաղթել իր պատերազմում։ Համոզված եմ, որ չի՛ հաղթելու»։ Կանցլերը կոչ արեց ընդդիմանալ Ռուսաստանի նախագահի իշխելու հավակնություններին։ Խոսքը Պուտինին հասկացնելն է, որ «թելադրված խաղաղություն» չի լինելու, ասել է, թե այնպիսի խաղաղություն, որի պայմանները մի կողմն է որոշում։ «Ուկրաինան դա չի ընդունի, մենք՝ նույնպես», մայիսի 26-ին Դավոսում ձեւակերպեց ԳԴՀ կանցլեր Շոլցը։
Հայաստանը մի մեծ պատվիրակությամբ իհարկե ներկա է Դավոսում։ Մեզ հայտնի չէ, թե ինչ առանձնահատուկ կարեւոր, անհետաձգելի առաքելությամբ։ Եթե գնացել են խաղաղության բանաձեւը որոնելու, Շոլցն այդ կարեւոր հարթակից երեկ ձեւակերպել է՝ թելադրված, մի կողմի՝ ագրեսորի, Ադրբեջանի եւ Թուրքիայի պարագայում ստույգ բնորոշմամբ՝ դահիճի որոշած պայմանները ո՛չ Արցախը, ոչ՛ Հայաստանը չեն ընդունելու։ Կանցլերը հուշեց՝ իրենք էլ չեն ընդունելու։
ԱՆԱՀԻՏ ՀՈՎՍԵՓՅԱՆ
Գերմանիա
