Իշխանությունը հանձն է առել իրականացնե՞լ Ալիեւի՝ Հայաստանն առանց բանակի թողնելու երազանքը

37

Ադրբեջանի նախագահ Իլհամ Ալիեւը 44-օրյա պատերազմից հետո մեկ անգամ չէ, որ հայտարարել է՝ Հայաստանը չպետք է վերազինի ու վերականգնի իր բանակը: Նրա համոզմամբ՝ «հայկական բանակ այլեւս չկա եւ չպետք է լինի»։

«Մենք երբեք թույլ չենք տա, որպեսզի մեզ համար սպառնալիք ստեղծվի, կամ ազատագրված տարածքներ վերադարձող մեր քաղաքացիների համար վտանգներ ի հայտ գան»,- մոտ երկու տարի առաջ, 2021-ի փետրվարին, հայտարարում էր Ադրբեջանի առաջնորդը:

Ալիեւի հոխորտանքներն, անշուշտ, թե՛ հայ հասարակության, թե՛ առավել եւս ՀՀ իշխանությունների համար անգամ քննարկման առարկա չպետք է լինեն, սակայն հաշվի առնելով այն ամենն, ինչ կատարվում է աղետալի պատերազմից հետո, կարելի է ենթադրել, որ հայաստանյան իշխանությունները հանձն են առել սեփական ձեռքերով երբեմնի անուն ու հռչակ վայելող հայկական բանակը հողին հավասարեցնել:

Երեկ Գեղարքունիքի մարզում տեղի ունեցած ողբերգությունը վարչապետ Նիկոլ Փաշինյանն այնպիսի հանդարտությամբ էր ներկայացնում, որ ասես որեւէ հետեւանք չթողած միջադեպի մասին պատմեր: Ընդունեք՝ դեպքի նախաքննությունը չավարտված՝ լուրջ դեմքով պատմել, թե ինչպես է սպան 5 լիտրանոց հրավտանգ տարան իր ձեռքից շպրտել ու այդպիսով պայթյուն առաջացրել, գոնե դույզն-ինչ առարկելի է:

Վարչապետի կողքին պինդ ու առանց ափսոսանքի նշույլի, դեմքի անվրդով արտահայտությամբ նստած Սուրեն Պապիկյանը վարչապետին նախեւառաջ պետք է այն հարցի պատասխանը տա, թե ինչու էին 18-20 տարեկան երիտասարդները ճաղավանդակներով բանտված լուսամուտներով կացարանում բնակվում: Այս հարցն, անխոս, միակը չէ, ու ողբերգության իրական պատճառները բացահայտելու համար դեռ երկար նախաքնություն պետք է իրականացվի, եթե, իհարկե, Փաշինյանի իշխանությունը դա անելու քաղաքական կամք կունենա:

2018-ի հունվարին՝ նախքան վարչապետի պաշտոնը ստանձնելը, այն ժամանակվա ուլտրաընդդիմադիր Փաշինյանը բանակում շմոլ գազից թունավորման հետեւանքով զոհ ունենալը սարսափ էր համարում, այժմ սակայն առանց սեփական թիմի պատասխանատվության գիտակցման, միանգամից 15 զոհի մասին է հայտարարում:

Ողբերգական այս դեպքը, ցավոք, միակը չէ. սրանից ժամանակներ առաջ էլ զինվորականներ տեղափոխող ավտոմեքենան էր վթարվել, ինչի պատճառով մի քանի զինվորականներ էին զոհվել: Մեկ այլ զինվորական էլ էլկետրահարվելու հետեւանքով էր մահացել: Մահվան ելքով միջադեպերը, ցավոք, այսքանով չեն ավարտվում, ու եթե Փաշինյանի իշխանութունը ցավալի այս միտումը չկանգնեցնի, ապա Ալիեւն իր հերթական նպատակին՝ Հայաստանն առանց բանակի թողնելուն հասնելու համար առանձնապես ջանքեր չի էլ գործադրի:

ՍԵՎԱԿ ՎԱՐԴՈՒՄՅԱՆ