Նոյեմբերի 1-ին Հովհաննես Թումանյանի տուն-թանգարանի ցուցասրահում տեղի ունեցավ «ԻՄ ԱՇԽԱՐՀՆ ԱՅՍՕՐ ԵՒ ՎԱՂԸ » խորագիրը կրող ցուցահանդեսի բացման արարողությունը, որի մասնակիցներն էին Խ.Աբովյանի անվան Հայկական պետական մանկավարժական համալսարանի գեղարվեստական լուսանկարչության բաժնի ուսանողները, շրջանավարտներն ու դասախոսները: 37 հեղինակների շուրջ 140 ստեղծագործությունների ցուցադրումն իրականացավ ՄԱԿ-ի հայաստանյան գրասենյակի օժանդակությամբ: Գեղարվեստական ղեկավար ՝ ՀՀ Արվեստի վաստակավոր գործիչ, պրոֆեսոր Սամվել Սեւադան բացման արարողությանը հատկանշելով համալսարանի 100-ամյա պատմության եղելությունը, շնորհակալություն հայտնեց ե՛ւ ՄԱԿ-ի գրասենյակի, ե՛ւ թանգարանի տնօրենությանը նման հնարավորություն ընձեռելու համար: Ցուցահանդեսին ներկա էին համալսարանի պրոֆեսորադասախոսական անձնակազմը, ուսանողներ, շրջանավարտներ, գեղարվեստական լուսանկարչությամբ հետաքրքրվողներ եւ հյուրեր: Հայկական պետական մանկավարժական համալսարանի ռեկտոր, հոգեբանական գիտությունների դոկտոր, պրոֆեսոր Սրբուհի Գեւորգյանը ջերմորեն ողջունելով ներկաներին՝ նշեց, որ ներկայացված աշխատանքները վավերացնում են ՄԱԿ-ի մարդասիրական կարեւորագույն թեզերը, որոնք ամրագրված են նաեւ բուհի առաքելությամբ:
ՄԱԿ-ի մշտական համակարգողի պաշտոնակատար Լիլա Փիթրս Յահիան հանդիսավոր արարողությանը նշեց, որ պատիվ ունի գտնվելու նման ցուցադրությանը, որ լի է գույներով եւ դրականությամբ.
-Ձեր արվեսի միջոցով կեղծ լուրեր չեք պատմում, իսկ մենք գիտենք, որ արդիացումը ինչպես է ողոված կեղծ լուրերով; Արվեստով արտահայտում եք ձեր ներքին աշխարհը, ձեր զգացողությունները, ինչը լայն նշանակություն ունի, եթե մենք ժողովրդավարությունը համարում ենք կարեւոր արվեստ,- նշեց պաշտոնակատարը, եւ շնորհավորելով համալսարանի 100-ամյակի կապակցությամբ՝ մաղթեց երկարակեցություն:
«Իմ աշխարհն այսօր եւ վաղը» խորագիրը կրող ցուցահանդեսը կգործի մինչեւ նոյեմբերի 7-ը:
ՀԵՂԻՆԵ ՄԽԻԹԱՐՅԱՆ
ՀՊՄՀ, Լրագրության բաժին, 2-րդ կուրս
