«Գրական վաստակի համար» մեդալ՝ ԲԱԲԿԵՆ ՍԻՄՈՆՅԱՆԻՆ

Ցերեկույթ՝ նվիրված արժանավոր գործչին

Հայաստանի գրողների միության «Կլոր սրահում» օրերս տեղի ունեցավ բանաստեղծ, թարգմանիչ, հրապարակախոս Բաբկեն Սիմոնյանին «Գրական վաստակի համար» մեդալի հանդիսավոր հանձնման արարողությունը: Այդ մեդալով նրան պարգևատրելու որոշումը կայացել է ՀԳՄ նախագահության որոշմամբ՝ գրողի ծննդյան 70-ամյակի առթիվ եւ գրականության բնագավառում բեղուն ու արգասաբեր գործունեության համար:

Բաբկեն Սիմոնյանի գրական-թարգմանչական եւ մշակութաբանական գործունեության ու վաստակի մասին ջերմությամբ խոսեցին ՀՀ գրողների միության նախագահ Էդուարդ Միլիտոնյանը, ՀՀ ԳԱԱ ակադեմիկոս, պատմաբան Աշոտ Մելքոնյանը, ՀՀ ԳԱԱ թղթակից անդամ, գրականագետ Աելիտա Դոլուխանյանը, ՀԳՄ քարտուղար, գրականագետ, բանասիրական գիտությունների դոկտոր Պետրոս Դեմիրճյանը: Բարձր գնահատելով հայ-սերբական կապերի ոլորտում նրա անցած ստեղծագործական արգասավոր ուղին, որը սկիզբ է առել 1975 թվականին, նշեցին Սիմոնյանի կարեւոր եւ բացառիկ դերը՝ որպես բախտակից ժողովուրդների միջեւ կամուրջներ կերտող մտավորականի: Անցած ավելի քան չորսուկես տասնամյակների ընթացքում Բաբկեն Սիմոնյանը գրահրատարակչական մեծ գործունեություն է ծավալել՝ իր առաջաբաններով ու թարգմանությամբ ներկայացնելով հայ եւ սերբ գրողներին: Հայ-սերբական գրական ու մշակութային կապերին եւ սերբահայ գաղթօջախին վերաբերող դասախոսություններով բազմիցս հանդես է եկել Բելգրադում, Նովի Սադում, Վիեննայում, Ֆրանկֆուրտում, Թեհրանում, Բեյրութում: Այդ դասախոսությունների միջոցով նա ավելի է մոտեցրել հայերին ու սերբերին:

Աշոտ Մելքոնյանը եւ Աելիտա Դոլուխանյանը դրվագներ պատմեցին անցյալ տարի Սերբիա կատարած ուղեւորությունից՝ Բելգրադում Մովսես Խորենացու «Հայոց պատմությունը» աշխատության սերբերեն հրատարակության շնորհանդեսի կապակցությամբ, որը կազմակերպել էր Բաբկեն Սիմոնյանը, քանի որ Պատմահոր աշխատության սերբերեն հրատարակության խմբագիրն ու առաջաբանի հեղինակն է:

Բաբկեն Սիմոնյանի մասին դրվատանքով խոսեց ՀՀ-ում Սերբիայի դեսպանության խորհրդական Զորան Մարինկովիչը: Նա նշեց, որ անգնահատելի է նրա դերը եւ ավանդը բախտակից երկու ժողովուրդներին մերձեցնելու գործում: Անդրադառնալով հայ-սերբական կապերին՝ նա չմոռացավ խոսել հայերի մեծ ավանդի մասին՝ Վիեննայի Մխիթարյան միաբանության տպարանում 19-րդ դարի սերբական գրականության նշանավոր գործիչների գրքերի տպագրման առումով: Բանախոսն անդրադարձավ նաեւ Սիմոնյանի հյուպատոսական գործունեությանը՝ նշելով, որ գրական գործունեությունից զատ նա ակտիվ համագործակցում է ՀՀ-ում Սերբիայի դեսպանատան հետ, եւ «Գրական վաստակի համար» մեդալը, ի թիվս այլ մրցանակների ու պարգեւների, լավագույն նվերն է նրա հոբելյանի առթիվ:

Գրականագետ Պետրոս Դեմիրճյանը հուշեր պատմեց Բաբկեն Սիմոնյանի հետ Սերբիա կատարած ուղեւորությունից, երբ նրա հետ մեկնել էր Բելգրադ՝ տեղի «Կնիժեւնա րեչ» (Գրական խոսք) 16 էջանոց գրական թերթում հայ գրականությանը նվիրված հատուկ համար պատրաստելու նպատակով: Երկիրն այդ ժամանակ հայտնվել էր պատերազմի բոցերում, բայց թերթի գլխավոր խմբագիրը չերկմտեց իրականացնելու «հայկական համարը» լույսընծայելու մեր նախնական պայմանավորվածությունը, փաստ, որ հայ-սերբական անկեղծ ու անշահախնդիր բարեկամության լավագույն արտացոլումն է:

Հանդիսությունը վարում էր սիրված ասմունքող Գայանե Սամվելյանը: Նա ներկայացրեց բանաստեղծություններ հոբելյարի գրքերից:

Շնորհակալական խոսքում Բաբկեն Սիմոնյանն անդրադարձավ իր առաջիկա ծրագրերին ու անելիքներին, իսկ վերջում՝ իր թարգմանությամբ սերբերենով ներկայացրեց Եշիշե Չարենցի «Ես իմ անուշ Հայաստանի» բանաստեղծությունը:

ՀՐԱՉՅԱ ԲԱԼՈՅԱՆ (Արմենյան)

Բան. գիտ. թեկնածու