Բելգիայում, Լյուքսեմբուրգում դեսպան, ԵՄ-ում Ադրբեջանի ներկայացուցչության ղեկավար Վագիֆ Սադիգովը մարտի 5-ին X-ի իր էջում դիվանագիտական բառապաշարը մոռացած, քաղաքական, փողոցային արտահայտություններով է նկարագրում իր ուրախությունը, թե Բաքվի դատարանում «Ղարաբաղում ապօրինի զինված անջատականների նախկին ղեկավարները» սկսել են «երգել», եւ շուտով կպարզվի՝ ով է պատերազմ սկսել, հարձակումներ ծրագրել, լուրջ փոփոխություն է լինելու, պաշտոնական Երեւանի «նարրատիվները» տապալվելու են, իսկ դատարանն ունի բավարար ապացույցներ, որ չեն արտոնելու մեղադրյալներին տուժող համարել: Դիվանագիտական էթիկայի հանձնաժողով չկա՞, որ կստիպի պատժամիջոց կիրառել դեսպանի դեմ, մանավանդ անցյալում Սադիգովը սպառնացել էր Բրյուսսելում ՀՀ դեսպան Տիգրան Բալայանին: Սադիգովի սույն գրառումը մատնում է, որ հայ ռազմագերիների եւ պատանդների դատավարությունը քաղաքական է եւ շինծու:
«Բաքվում դատավարությունը բաց է հանրության, մեդիայի եւ օտարերկրյա դիվանագետների համար: Ուստի համբերատար եղեք, ճշմարտությունն ի հայտ է գալիս», ստով ամփոփում է Սադիգովը: Բացի «Ազերթաջից», ուրիշ լրատվամիջոց ներկա չէ դատավարությանը: Միգուցե ԵՄ երկրների ԶԼՄ-նե՛րը հայտ ներկայացնեն:
ԱՆԱՀԻՏ ՀՈՎՍԵՓՅԱՆ
Գերմանիա
