Դա ազդելու է Հայաստանի միջազգային վարկի վրա
Ազգային ժողովի՝ լրագրողների համար նախատեսված վայրը՝ օթյակը, պարզվում է, ԶԼՄ ներկայացուցիչներինն է ըստ պատեհության: Քիչ չէ՝ ԱԺ նախագահության հրահանգով խորհրդարանական նիստերի ուղիղ եթերը կարող է անջատվել ցանկացած պահի, Պետական պահպանության ծառայակիցների ձեռքերն էլ (նորից ցանկացած պահի) կարող են հասնել լրագրողների եւ վերջիններիս տեխնիկային, գույքին: Հրելով, ուժ գործադրելով, ընդհուպ գրկելով՝ մեզ հաճախ են վռնդում խորհրդարանական օթյակից, ինչ է թե լրագրողները չնկարեն եւ չլուսաբանեն «ազգընտիրների» քաշքշոցը, շշանետումներն ու հայհոյանքները:
«Լրագրողներին Ազգային ժողովի օթյակից բռնի ուժով հանելը չի կարող ունենալ որեւէ արդարացում: Դա միտումնավոր խոչընդոտ է լրագրողական գործունեության, ինչը ենթադրում է պատասխանատվություն՝ Քրեական օրենքով: Այս արատավոր պրակտիկային պետք է վերջ տալ»,- «Ազգ»-ի հետ զրույցում ասում է Խոսքի ազատության պաշտպանության կոմիտեի նախագահ Աշոտ Մելիքյանը:
Նրա գնահատմամբ՝ ԱԺ նախագահի հրահանգով ուղիղ եթերն անջատելը քաղաքացիների՝ տեղկացված լինելու իրավունքի խախտում է. «Շարքային քաղաքացին ու հասարակությունն իրավունք ունեն իմանալու, թե ի՞նչ է կատարվում եւ ի՞նչ է տեղի ունենում օրենսդիր մարմնում: Եթե անգամ բանը հասնում է ծեծկռտուքի, մարդիկ պետք է իմանան, թե ի՞նչ պատգամավոր են ընտրել: Իսկ ուղիղ եթերը նույնպես Ազգային ժողովի բաղկացուցիչ մաս է»:
Աշոտ Մելիքյանը կասկած չունի, որ լրատվամիջոցների հետ տեղի ունեցածը չի վրիպի միջազգային կազմակերպությունների աչքից:
«Ազգ»-ին ՀԱՊԿ ղեկավարը փոխանցեց, որ իրենց կառույցը մինչեւ հունիսի 12-ն արդեն իսկ արձանագրել էր 10-ից ավելի խախտումներ: «Խոսքը ֆիզիկական բռնությունների ու ճնշումների մասին է: Մենք այդ ամենն արձանագրել ենք, եւ դա մեր զեկույցներում տեղ է գտնելու: Միջազգային կառույցները սովորաբար հաշվի են առնում նաեւ մեր զեկույցները, եւ հաճախ հղում են անում հենց մեր արձանագրումներին: Այս ամենը, ցավոք ու ամենայն հավանականությամբ, կազդի Հայաստանի վարկանիշի վրա՝ խոսքի ազատության տեսնակյունից, որովհետեւ փաստերը շատ են եւ անհերքելի»,- զրույցն ամփոփեց լրագրողապաշտպան կառույցի ղեկավարը:
ՍԵՎԱԿ ՎԱՐԴՈՒՄՅԱՆ
