Հյուսիսատլանտյան դաշինքի՝ ռուսական մշտական ներկայացուցչության ութ աշխատակիցների հավատարմագրումը չեղարկելու որոշման պատճառով Ռուսաստանը կասեցնում է ՆԱՏՕ-ում իր մշտական առաքելության աշխատանքը: Այս մասին երկուշաբթի մամլո ասուլիսի ժամանակ հայտարարել է ՌԴ ԱԳ նախարար Սերգեյ Լավրովը՝ պատասխանելով ՏԱՍՍ-ի հարցին:
«ՆԱՏՕ-ի նպատակաուղղված քայլերի արդյունքում մենք չունենք համապատասխան պայմաններ տարրական դիվանագիտական գործունեության համար, և ի պատասխան ՆԱՏՕ-ի գործողությունների, մենք դադարեցնում ենք ՆԱՏՕ-ում մեր մշտական առաքելության աշխատանքը, ներառյալ գլխավոր ռազմական ներկայացուցչի աշխատանքը, հավանաբար նոյեմբերի 1-ից, կամ գուցե դա կտևի ևս մի քանի օր», – ասել է նա:
Լավրովը նշել է, որ Մոսկվայում դադարեցվում է նաև ՆԱՏՕ-ի տեղեկատվական բյուրոյի գործունեությունը: «Հենց այսօր մենք հայտարարեցինք նման [պատասխան] քայլերի մասին: ՆԱՏՕ-ի միջազգային քարտուղարությունն արդեն տեղեկացվել է», – ասել է Լավրովը:
