Թուրքիայի արտգործնախարար Մևլութ Չավուշօղլուն այսօր հայտարարել է․
«Մենք կշարունակենք աջակցել Աֆղանստանի տնտեսական զարգացմանը և [այդ երկրում] խաղաղության ու կայունության հաստատմանը: Ներկա պահին մենք կցանկանայինք ասել, որ դրական ենք ընկալում թալիբների ուղերձները: Մենք շարունակում ենք երկխոսությունը պահպանել բոլոր կողմերի, այդ թվում՝ թալիբների հետ», նրա խոսքը մեջբերում է Անադոլու գործակալությունը:
Օգոստոսի 15-ին Չավուշօղլուն հայտարարել էր, որ Անկարան ձեռնարկել է բոլոր անհրաժեշտ միջոցները Աֆղանստանում թուրքական դիվանագիտական ներկայացուցչությունների հետ կապված, և Քաբուլում Թուրքիայի դեսպանատունը շարունակում է իր գործունեությունը: Այն պատրաստ է անհրաժեշտ օգնություն ցուցաբերել Թուրքիայի այն քաղաքացիներին, ովքեր կցանկանան լքել Աֆղանստանը:
