«ԱՄՆ կառավարությանը մեղադրում եմ անմիջական ներգրավվածության մեջ»․ Կուբայի արտգործնախարար
Կուբայի արտաքին գործերի նախարար Բրունո Ռոդրիգես Պարրիյան հայտարարել է, որ ԱՄՆ իշխանություններն ուղղակիորեն մասնակցել են հանրապետությունում կիրակի օրը բողոքի ցույցերի կազմակերպմանը:
«ԱՄՆ կառավարությանը մեղադրում եմ անմիջական ներգրավվածության մեջ, այն էական պատասխանատվություն է կրում հուլիսի 11-ի իրադարձությունների համար», ասել է արտգործնախարարը մամուլի ասուլիսի ժամանակ:
«Հուլիսի 11-ին [բողոքի ցույցերին] մասնակցում էին նրանք, ովքեր ԱՄՆ-ում կկոչվեին «օտարերկրյա տերության գործակալներ», նրանք, ովքեր [արտասահմանից] ֆինանսավորում և ցուցումներ են ստանում, նրանք, ովքեր դիվանագիտական կարգավիճակ ունեցող մեքենաներով են ճանապարհորդում, ովքեր հանդիպում են ամերիկացի դիվանագետների հետ, նրանք, ովքեր անընդհատ այցելում են դիվանագիտական հաստատություններ, և նրանք, ում անընդհատ գործողություններ են հրահրում Կուբայի սահմանադրական կարգի և օրենքների դեմ», ասել է նախարարը: Նրա խոսքով ՝ անկարգություններին մասնակցել են նաև քրեական անցյալ ունեցող անձինք:
