ԱՄՆ-ը մտադիր է այս տարի գագաթաժողով անցկացնել Ավստրալիայի, Ճապոնիայի և Հնդկաստանի ղեկավարների հետ
ԱՄՆ նախագահ Ջո Բայդենը մտադիր է 2021 թվականին գագաթաժողով անցկացնել Հնդկաստանի, Ճապոնիայի և Ավստրալիայի ղեկավարների հետ: Այս մասին երեքշաբթի օրը հայտարարել է Սպիտակ տանը ենթակա Ազգային անվտանգության խորհրդի Հնդկա-Խաղաղօվկիանոսյան հարցերի համակարգող Կուրտ Քեմփբելը:
«Կարծում եմ, որ այս տարվա վերջին, երբ նախագահը [Բայդենը] Վաշինգտոնում ընդունի քառակողմ երկխոսության երկրների ղեկավարներին, դուք կտեսնեք որոշ փոփոխություններ, որոնք որոշիչ կլինեն ոչ միայն պատվաստանյութերի դիվանագիտության, այլև ենթակառուցվածքների ոլորտում», ասել է նա Asia Society հետազոտական կենտրոնի տեսակոնֆերանսի ժամանակ:
Քեմփբելը նաև նշել է, որ ԱՄՆ-ն պատրաստվում է «ավելի արդյունավետ» քաղաքականություն վարել Ասիայում, մասնավորապես տնտեսական համաձայնագրերի ու թվային հարցերի վերաբերյալ:
