Գորիսի Ուսուցչի տունն աճուրդով վաճառվել է: Այս մասին «Հետքին» հայտնել է պետգույքի կառավարման կոմիտեն: Ընդ որում՝ գույքը վաճառվել է աճուրդի մեկնարկային գնով՝ 31 միլիոն 876 հազար դրամով: Գնորդը, կոմիտեի փոխանցմամբ, քաղաքացի Գ. Գրիգորյանն է:
Հիշեցնենք, որ Գորիսի Ուսուցչի տունը սեփականության իրավունքով պատկանում էր ԿԳՄՍՆ-ին ենթակա «Կրթության ազգային ինստիտուտ» ՓԲԸ-ին, որը լուծարման փուլում է: Այս թեմային անդրադարձել էինք փետրվարին: Ընկերության պարտքերը մարելու նպատակով դրա գույքը ներկայացվել է հրապարակային աճուրդի: Պետգույքի կառավարման կոմիտեն նշել է, որ բացի շենքի գնից՝ գնորդը պարտավոր է սահմանված կարգով վճարել շենքի զբաղեցրած հողամասի՝ տվյալ պահին գործող կադաստրային արժեքը:
Գորիսի Ուսուցչի տունը պատմամշակութային հուշարձան է: Այն ընդգրկված է 2005 թ. կառավարության կողմից հաստատված ցուցակում, որտեղ ներառված են Սյունիքի մարզի պատմության եւ մշակույթի անշարժ հուշարձանները:
Պատմամշակութային հուշարձանների վրա տարածվում է «Պատմության եւ մշակույթի անշարժ հուշարձանների ու պատմական միջավայրի պահպանության եւ օգտագործման մասին» օրենքը, որը սահմանում է նաեւ, որ կառավարությունը հաստատում է պետական սեփականություն համարվող այն հուշարձանների ցուցակը, որոնք ենթակա չեն օտարման։ 2007 թ․ կառավարության հաստատած այդ ցուցակում Գորիսի Ուսուցչի տունը չկա։ Հենց այս հիմքով էլ հուշարձանը հանվել էր աճուրդի:
Միաժամանակ պետգույքի կառավարման կոմիտեից մեզ հայտնել են, որ փետրվարին կայացած աճուրդից հետո՝ մարտին, գնորդ Գ. Գրիգորյանի եւ Սյունիքի մարզպետի միջեւ կնքվել է հուշարձանի օգտագործման պահպանական պարտավորագիր։ Բացի դրանից՝ գնորդի եւ «Կրթության ազգային ինստիտուտ» ՓԲԸ-ի լուծարման հանձնաժողովի միջեւ ապրիլին կնքված պայմանագրում ամրագրվել են օրենքի պահանջները, ըստ որոնց՝ սեփականատերը պարտավոր է պահպանել հուշարձանի անվտանգությունն ու անվթարությունը, ապահովել դրա մատչելիությունն ուսումնասիրության եւ պահպանության վերահսկման համար, կատարել ամրակայման, նորոգման, բարեկարգման աշխատանքներ՝ դրանց նախագծերը նախապես ներկայացնելով լիազոր մարմնին (նախարարությանը) եւ համաձայնեցնելով վերջինիս հետ։
hetq.am
