Մենք շտապ պետք է բանակցություններ սկսենք զենքի վերահսկման հարցի շուրջ, ՌԴ Առաջին ալիքի եթերում հայտարարել է ՌԴ նախագահի մամուլի քարտուղար Դմիտրի Պեսկովը:
«Այո, Ռազմավարական հարձակողական զենքի կրճատման պայմանագիրը երկարաձգվել է, ընդունվել է Բայդենի վարչակազմի քաղաքական որոշումը: Սա դրական փաստ է, բայց ժամանակը կարճանում է, ինչպես Շագրենի կաշին: Բանակցությունները պետք է անհապաղ սկսել», ասել է Կրեմլի խոսնակը՝ շեշտելով, որ դա կլինի շատ բարդ զրույց:
Պեսկովը հավելել է, որ այժմ հարցն այն է, թե ինչպես և երբ սկսել այդ բանակցությունները, ինչ մեխանիզմների շրջանակներում: «Դա նույնպես պետք է որոշեն այսօր երկու նախագահները», ասել է նա:
ՌԴ նախագահի մամուլի քարտուղարը շեշտել է, որ ռազմավարական կայունությունը և զենքի վերահսկումը նուրբ և բարդ խնդիր է: «Այս պարագայում դա արդեն դուրս է գալիս մեր երկկողմ հարաբերությունների շրջանակից: Դա վերաբերում է ամբողջ աշխարհին», եզրափակել է նա:
