Զախարովա․ «Մեր տեղեկություններով՝ Ադրբեջանի զորավարժությունները տարածաշրջանում անվտանգության համար վտանգ չեն ներկայացնում»
Ադրբեջանի զինված ուժերի օպերատիվ-մարտավարական զորավարժությունները, որոնք անցկացվելու են մարտի 15-ից 18-ը, կրում են պլանային բնույթ և ռիսկեր չեն պարունակում տարածաշրջանում կայունության և անվտանգության համար: Այս մասին ուրբաթ օրն ասել է Ռուսաստանի Դաշնության Արտաքին գործերի նախարարության պաշտոնական ներկայացուցիչ Մարիա Զախարովան՝ պատասխանելով համապատասխան հարցին:
«Սովորաբար զորավարժություններն անցկացվում են Հարավային Կովկասի բոլոր պետությունների կողմից, դա արվում է կանոնավոր կերպով, համապատասխան տեղեկությունները նախապես հաղորդվում են շահագրգիռ կողմերին: Մեր տեղեկություններով, նշված վարժանքները կրում են, ինչպես ասացի, պլանային բնույթ՝ ուղղված զորքերի մարտական պատրաստվածության կատարելագործմանը, և ռիսկեր չեն ստեղծում տարածաշրջանում կայունության և անվտանգության համար», ասել է դիվանագետը, որի խոսքերը մեջբերում է ՏԱՍՍ-ը:
Չորեքշաբթի օրը Ադրբեջանի ՊՆ մամուլի ծառայությունը հայտարարել էր առաջիկա զորավարժությունների մասին, որոնց մասնակցելու են 10 հազար զինծառայողներ:
