Լրագրողներն այսօր ԱԺ նախագահ Ալեն Սիմոնյանից հետաքրքրվեցին՝ արդյոք Երևանում անցկացված Եվրոպական քաղաքական համայնքի գագաթնաժողովն ավելի չի բարդացնի հայ-ռուսական հարաբերությունները։
Ի պատասխան՝ Ալեն Սիմոնյանը նկատեց.
«Ես չգիտեմ՝ այդ տրամաբանությունը, որ Հայաստանն իր շահերը հետապնդի՝ միշտ հետ նայելով, թե հանկարծ Ռուսաստանը չի նեղսրտում, որքանո՞վ է ճիշտ: Ես համարում եմ՝ դա ճիշտ չէ, որովհետև երբ Ռուսաստանն իր շահերն է առաջ տանում, չի նայում՝ կանգնո՞ւմ է Հայաստանի շահերի վրա, թե չի կանգնում»,- ասաց Սիմոնյանը՝ հավելելով, որ Հայաստանն ընդամենն ապահովում է քաղաքականությունն ու իր անվտանգությունը։
Ըստ նրա՝ երբ Հայաստանն Ադրբեջանի հետ պատերազմական վիճակում էր, Ռուսաստանն Ադրբեջանին և՛զենք էր վաճառում, և՛ դաշնակցային հարաբերությունների մեջ էր և ասում էր՝ մենք անկախ պետություն ենք, և բոլորի հետ ունենք մեր հարաբերությունները:
Իսկ Հայաստանի պիտի ճո՞րտ լինի, իրեն ասե՞ն՝ սրա հետ լավ լինի, նրա հետ լավ չլինի՞»,- հարց ուղղեց նա:
Դիտարկմանը, որ Հայաստանը տնտեսական մեծ կախում ունի Ռուսաստանից, Սիմոնյանը նկատեց՝ չի ուզում կտրուկ բաներ ասել, բայց պետք է հասկանալ, թե ինչ է կախվածությունը։
«Կա՛մ մենք ծնկած ապրում ենք ինչ-որ մեկի՝ լինի դա Ֆրանսիան, Ռուսաստանը կամ որևէ այլ գերտերության սապոգի տակ և ձեններս կտրում ենք, կա՛մ փորձում ենք առանց որևէ մեկի հետ պատերազմելու, թշնամանալու տեր կանգնել մեր փոքր պետությանը:
Մենք պետք է տեր կանգնենք մեր երկրին։ Նախկինում մենք եղել ենք ծնկած, որովհետև մեր նախագահական ընտրություններն անցել են կեղծիքներով, և ԿԸՀ-ն, դեռ արդյունքները չհայտարարած, Ռուսաստանը շնորհավորել է, մեր ուժայինների մեծ մասը ճշտվել է Ռուսաստանի հետ, մեր քաղաքական ամբողջ կոնյունկտուրան, ողջ ուղեծիրը համաձայնեցվել են ու զուգահեռ տարվել։ Մի՞թե սա քաղաքական անկախություն է։ Մինչև 2018 թվականն անկախություն չենք ունեցել։
Իսկ 2020 թվականից հետո, հաշվի առնելով տեղի ունեցածը… Լեռնային Ղարաբաղի ժողովուրդը տեսավ, որ մեր դաշնակիցը, առնվազն, մենակ թողեց մեզ», – շեշտեց ԱԺ խոսնակը։
