Նախօրեին մի խումբ սփյուռքյան գործիչներ հայտարարություն էին տարածել, որով նշում էին, որ Հայ առաքելական եկեղեցու ղեկավարության վրա հետեւողական հարձակումներն ու նրա առաջնորդին հարկադրաբար հեռացնելու սպառնալիքները սպառնալիք են ամբողջ հայության համար:
Հայտարարությունը ստորագրել էին իրենց գործունեության բնագավառներում միջազգային ճանաչում ունեցող գործիչներ՝ Նուբար Աֆեյանը, Էնթոնի Բարսամյանը, Լորդ Արա Դարզին, Էրիկ Էսրայելյանը, Վաչե Գաբրաշը, Վաչե Մանուկյանը, Ջոզեֆ Ուղուրլյանը,Պերճ Սեդրակյանը:
Այս հայտարարությունն ինձ հիշեցրեց տասնամյա վաղեմության մեկ այլ նախաձեռնություն, որի շարքում էին նաեւ նախօրեի հայտարարության առնվազն երկու մասնակից՝ Նուբա Աֆեյանն ու Լորդ Արա Դարզին: 2016 թվականին՝ ՀԲԸՄ 110-ամյակի առիթով մի հայտարարություն արեցին մի քանի տասննյակ հայաստանցի եւ սփյուռքահայ գործիչներ, ասելով, որ եկել է «Գլոբալ հայերի ժամանակը»:
«Հանուն Հայաստանի առաջխաղացման աշխատող անհատները, ինչպես նաեւ հասարակական եւ մասնավոր կազմակերպությունները հայ ժողովրդի ապագան ավելի լավը դարձնելու համար պետք է համախմբվեն, միավորեն իրենց միջոցները եւ համագործակցեն: Մենք վստահ ենք, որ հաջողության հասնելու համար չի կարելի մեկուսացած՝ որպես Հայաստան եւ Սփյուռք գործել. մենք պետք է համախմբվենք եւ միասնական ուժ դառնանք: Մենք այս քայլը նախաձեռնում ենք Հայաստանը միասնաբար առաջ մղելու երկարաժամկետ հանձնառությամբ եւ ողջունում ենք բոլոր նրանց, ովքեր կմիանան մեզ», ասում էին նրանք:
Այդ հայտարարությունը ստորագրողներից Ռուբեն Վարդանյանը այսօր պատանդառված է Բաքվի բանտում, իսկ Վարդան Գրեգորյանը եւ Շարլ Ազնավուրը՝ ողջ չեն: Սամվել Կարապետյանը ներկայացրել է Հայաստանում իշխանություն լինելու հայտ: Հայտարարությունը ստորագրողների շարքում էին իհարկե հայաստանցի եւ սփյուռքահայ շատ այլ գործիչներ, օրինակ Արթուր Ջանիբեկյան, Սամվել Կարապետյան, Աբել Աղանբեկյան, Անդրե Անդոնյան, Ռալֆ Յիրիկյան, Պիեռ Գյուրջյան, Գրեգ Սարգսյան, Սեմմ Սիմոնյան, Սերժ Չուրուկ եւ այլն:
Ի՞նչ եղավ «Գլոբալ հայերի» նախաձեռնությունը, ու՞ր են հիմա դրա մյուս մասնակիցնները: Հարցադրումն իհարկե այն մասին չէ, թե ֆիզիկապես ուր են եւ ինչ են անում: Իհարկե ամեն մեկը ունի իր գործն ու շարունակում է զբաղվել դրանով: Խոսքն այն մասին է, թե ի՞նչ եղավ նրանց հավաքական նախաձեռնությունը:
Հակոբ Բադալյան, քաղաքական վերլուծաբան
