«ԱՄՆ-ի որոշումը՝ ԵՄ քաղաքացիների և պաշտոնյաների մուտքն արգելելու մասին, մեր ինքնիշխանությունը խաթարելու անընդունելի փորձ է։ Եվրոպան կշարունակի պաշտպանել իր արժեքները՝ խոսքի ազատությունը, արդար թվային կանոնները և սեփական տարածքն անկախ կարգավորելու իրավունքը»: Սա Եվրահանձնակատար Կայա Կալասի հայտարարությունն է, ի պատասխան ԵՄ մի շարք նախկին պաշտոնյաների հանդեպ պատժամիջոց կիրառելու ԱՄՆ որոշման:
ԱՄՆ այդ որոշումը կայացրել է ի պատասխան ամերիկյան թվային ընկերությունների հանդեպ Եվրամիության սահմանափակումների:
Կայա Կալասի այս հայտարարության առիթով հնարավոր է արձանագրել մի ուշագրավ «դիլեմա», որի առաջ կարող են հայտնվել Հայաստանում այն ուժերը, որոնք այսօր «ավետում» են փետրվարին ԱՄՆ փոխնախագահ Վենսի հնարավոր այցի մասին:
Ես նախօրեին առիթ ունեցա կարծիք հայտնելու, որ, եթե Վենսը այցելելու է Հայաստան, ապա մեծ հավանականությամբ դա լինելու է ռեգիոնալ այցի շրջանակում, այլ ոչ թե այց միայն Հայաստան:
Այդ ամենից զատ, Վենսը ԱՄՆ այն պաշտոնյան է, որը Եվրամիության հանդեպ Թրամպի վարչակազմի կոշտ ընդդիմախոսության ու քննադատության դրոշակակիրն է: Վենսը ԵՄ-ից քարը քարին չթողեց անցնող տարվա փետրվարին՝ Մյունխենի անվտանգության միջազգային ամենամյա համաժողովի իր ելույթում, որը շոկը էր համաժողովի մասնակիցների, մասնավորապես եվրոպացիների համար:
Ընդ որում այն, որ դա ոչ թե իրավիճակային դրվագ էր, այլ քաղաքականություն, հաստատվեց օրերս հրապարակված ԱՄՆ ազգային անվտանգության ռազմավարության թարմացված փաստաթղթում, որտեղ Եվրամիությունը արժանանում է կոշտ գնահատականների՝ ժողովրդավարությունը սահմանափակելու, ազատ խոսքը սահմանափակելու համար:
Եթե Վենսը փետրվարին այցելի Հայաստան, ապա նրան հնարավոր «աղ ու հացով» դիմավորողները իհարկե կլինեն երկընտրանքի առաջ, որը պայմանական կարող ենք բնորոշել՝ «Վե՞նս, թե՞ Կալաս»: Գործնական առումով դա իհարկե առավել լայն ընդգրկում ունեցող դիլեմա է, որի առաջ այսօր եվրաատլանտյան միջավայրն է ընդհանրապես՝ պահպանողակա՞ն, թե՞ ձախ ուլտրալիբերալ սիմբիոզով գլոբալիստական արեւմուտք:
Իհարկե Հայաստանում այս հարցում իհարկե ավելի «ճկուն» են, քանի որ արեւմտամետությունը քաղաքական արեալլում չունի որեւէ գաղափարականություն: Արեւմուտքում որ կողմը հաղթի, նրան էլ կհարեն:
Հակոբ Բադալյան, քաղաքական վերլուծաբան
