«Տաշիր կապիտալի» կողմից հունիսի 6-ին եղել էր առաջարկ՝ էներգոբալանսի շեղման արդյունքում առաջացած շահույթի հաշվին իջեցնել սակագինը, հունիսի 13-ին ստացվել էր պատասխան, որ տարվա վերջում նոր կնայենք սակագինը։ Մեր հայտարարությունից հետո Հ1-ի եթերում Հանրային ծառայությունները կարգավորող հանձնաժողովի վարչության պետերից մեկը մեկնաբանել էր, որ մենք, իբրև թե, մի կողմից դիմել ենք սակագնի իջեցման՝ մյուս կողմից սակագնի բարձրացման 12 միլիարդ ներդրում ավել առաջարկելով։ Այս մասին այսօր հրավիրված մամուլի ասուլիսի ժամանակ հայտարարեց ՀԷՑ-ի նախկին տնօրեն Դավիթ Ղազինյանը։
«Դրանից հետո ես հրապարակեցի Հանրային ծառայությունների կարգավորող հանձնաժողովի այն նիստի ձայնագրությունը, որտեղ մենք առաջարկել էինք 12 միլիարդով ավելացնել ներդրումային ծրագիրը, որպեսզի պարզ լինի, որ «Տաշիր գրուպը» ասում էր՝ թույլ տվեք մենք 12 միլիարդով ավել այս տարի գծեր սարքենք, մալուխներ վերանորոգենք և դրա փոխհատուցումը, երբ գումար կունենաք՝ տվեք, այսինքն հետաձգելով փոխհատուցումը։ Ընդհուպ, խոսք էր գնում անգամ 30 տարվա մասին, և եթե չէ՝ մենք պատրաստ ենք մեր շահույթի հաշվին անել»,-նշեց նա։
Դավիթ Ղազինյանը սուտ որակեց իշխանության ներկայացուցիչների հայտարարությունները, թե ՀԷՑն առաջարկում է սակագինը իջեցնել ընդամենը 0.2 դրամով։
«Իրենք վերցրել են, ամբողջ տարվա կիլովատով արտադրանքը բաժանել են կես տարում առաջացած շահույթի վրա, դա մեկ դրամից ավել էր անում միանշանակ։ Ընդամենը պետք է 7.2 միլիարդը բաժանել 1.6 միլիարդի վրա և ստանալ ինչքանով էր հնարավոր իջեցնել բնակչության սակագինը։
Մեր առաջարկը վերաբերվել է օգոստոսի 1-ից վերանայել այդ պահին եղած շահույթի համամասնորեն բաժանելով»,- ասաց նա։
Դավիթ Ղազինյանը միաժամանակ շեշտեց՝ իշխանությունները որոշել են տարվա վերջում կամ եկող տարվա սկզբին սակագինն իջեցնել՝ չշեշտելով «Տաշիր կապիտալի» կամ Սամվել Կարապետյանի անունը և վերագրել դա իրենց լավ աշխատանքին, ինչը չստացվեց։
