Շնորհիվ մեր քաղաքացիների, որոնք ժողովրդական լեզվով ասած «թեգել» էին ինձ այդ պատկերի վրա, ես նայեցի և տեսա թե ինչ է տեղի ունեցել։ Տեսել եմ մի պատկեր, որտեղ անվտանգության աշխատակիցները, քաղաքացու բերանը փակած, նրան փորձում էին X վայրից տեղափոխել Y վայր։ Այս մասին այսօր լրագրողների հետ ճեպազրույցում ասաց արդարադատության նախարար Սրբուհի Գալյանը՝ անդրադառնալով կիրակի Հովհաննավանքում քաղաքացու բերանը փակելով դուրս հանելու միջադեպին։
Հարցին՝ որքանո՞վ է նման արարքը թույլատրելի ժողովրդավարական երկրում, նախարարը հարցով պատասխանեց.
«Դուք եղե՞լ եք այնտեղ, լսե՞լ եք ինչեր է ասել տվյալ քաղաքացին։ Գիտեք, ինչ-որ իրավիճակում այդ գործողությունը կարող է իրավաչափ գնահատվել, ինչ-որ իրավիճակում՝ բացարձակ ոչ։ Այսինքն՝ եթե մենք չգիտենք ելակետերը, որոնց հիման վրա գործել են տվյալ աշխատակիցները, որևէ գնահատական տալ չենք կարող։ Ես դրա համար միշտ հղում եմ կատարում իրավապահ մարմիններին, քանի որ գնահատական տալու գործը միայն նրանցն է։ Ես այնտեղ չեմ եղել, չեմ լսել՝ ինչ է ասել քաղաքացին, տեսել եմ պատկեր, որը ինձ համար բավարար չէ որևէ հետևություն անելու համար, և կարծում եմ՝ որևէ մեկի համար բավարար չէ»։
Ըստ Սրբուհի Գալյանի՝ ցանկացած պարագայում բռնության գործադրումն անընդունելի է, եթե այն համաչափ և իրավաչափ չէ։
Հարցին՝ պատրաստվո՞ւմ է այս կիրակի մասնակցել Հովհաննավանքում մատուցվելիք պատարագին, որին մասնակցելու է նաև Նիկոլ Փաշինյանը, նախարարը պատասխանեց՝ եթե քաղաքում լինի, ամենայն հավանականությամբ կմասնակցի։
