Էրդողանը թույլ չի տվել Նեթանյահուին մասնակցել Գազայի հարցով միջազգային խաղաղության գագաթնաժողովին
Մի շարք երկրների ղեկավարներ և բարձրաստիճան պաշտոնյաներ ժամանել են Եգիպտոս՝ մասնակցելու Գազայի հարցով միջազգային խաղաղության գագաթնաժողովին։
«Al Qahera» լրատվական գործակալությունը հայտնում է, , որ գագաթնաժողովի բացումից առաջ Եգիպտոսի նախագահ Աբդել Ֆաթթահ էլ Սիսին դիմավորել է Քաթարի շեյխ Թամիմ բին Համադ ալ Թանին, Հորդանանի թագավոր Աբդուլլահ II-ը, Բահրեյնի թագավոր Համադ բին Իսա ալ Խալիֆան և Պաղեստինի նախագահ Մահմուդ Աբբասին։
Ժամանել են նաև Ֆրանսիայի նախագահ Էմանուել Մակրոնը, Ինդոնեզիայի նախագահ Պրաբովո Սուբիանտոն, Գերմանիայի կանցլեր Ֆրիդրիխ Մերցը, Իտալիայի վարչապետ Ջորջիա Մելոնին, Պակիստանի վարչապետ Մոհամմադ Շեհբազ Շարիֆը և Սաուդյան Արաբիայի արտաքին գործերի նախարար արքայազն Ֆեյսալ բին Ֆարհանը։
Գագաթնաժողովի վայր են ժամանել նաև Մեծ Բրիտանիայի նախկին վարչապետ Թոնի Բլեյրը, ՄԱԿ-ի գլխավոր քարտուղար Անտոնիո Գուտերեշը և Արաբական լիգայի գլխավոր քարտուղար Ահմեդ Աբուլ Գեյթը։
Եգիպտոսի նախագահն ընդունել է նաև Մեծ Բրիտանիայի վարչապետ Քեյր Սթարմերին, Կանադայի վարչապետ Մարկ Քարնիին, Հունաստանի վարչապետ Կիրիակոս Միցոտակիսին և Ֆուտբոլի միջազգային ֆեդերացիայի (ՖԻՖԱ) նախագահ Ջանի Ինֆանտինոյին։
Եգիպտական քաղաք են ժամանել նաև Պարագվայի և Նիդեռլանդների պատվիրակություններ. հաղորդում է հեռուստաալիքը՝ առանց նշելու մասնակցության մակարդակը։
Ակնկալվում է, որ Շարմ էլ Շեյխի գագաթնաժողովին կմասնակցեն ավելի քան 20 համաշխարհային առաջնորդներ։ Գագաթնաժողովը համանախագահելու են Եգիպտոսի նախագահ Աբդել Ֆաթթահ էլ Սիսին և նրա ամերիկացի գործընկեր Դոնալդ Թրամփը։
Թուրքիան թույլ չի տվել Իսրայելի վարչապետ Բենիամին Նեթանյահուին մասնակցել Եգիպտոսում նախատեսված Գազայի հարցով գագաթնաժողովին. տեղեկությունը ստացվել է անանուն դիվանագիտական աղբյուրից։
«Նախագահ Ռեջեփ Թայիփ Էրդողանի նախաձեռնությամբ և Թուրքիայի դիվանագիտական ջանքերի արդյունքում, ինչպես նաև այլ առաջնորդների աջակցությամբ հնարավոր եղավ կանխել Նեթանյահուի մասնակցությունը գագաթնաժողովին», – նշել է աղբյուրը։
Իսրայելը մերժել է միջազգային աջակցություն ստացող Պաղեստինյան ինքնավարության ցանկացած դերակատարում Գազայում։
Եգիպտոսը հայտարարել է, որ գագաթնաժողովի նպատակն է «վերջ դնել Գազայում պատերազմին, ուժեղացնել Մերձավոր Արևելքում խաղաղություն և կայունություն հաստատելու ջանքերը և մեկնարկել տարածաշրջանային անվտանգության և կայունության նոր փուլ»։
