Գիւմրու տեղական ինքնակառավարման մարմինների ընտրութիւններից անցել է արդէն վեց ամիս, եւ քաղաքական գործընթացներն իրենց իրաւական հանգուցալուծումն ստացել են։ Սակայն, դժբախտաբար, մենք շարունակում ենք ականատես լինել մի մտահոգիչ իրականութեան՝ երբ իշխանական որոշ շրջանակներ դեռեւս չեն համակերպւում ժողովրդի յստակ արտայայտած կամքի հետ։
Երբ իշխանութիւնը հրաժարւում է ընդունել պարտութիւնը, իսկ կուսակցական շահը գերադասւում է քաղաքացու օրակարգից, սկսւում են վտանգաւոր գործընթացներ, որոնց ականատեսն ենք այսօր Գիւմրիում։
Այս ամիսների ընթացքում հետեւողականօրէն նկատւում են փորձեր՝
– Խաթարելու համայնքապետարանի կայուն աշխատանքը,
– Արգելակելու համայնքի զարգացման ծրագրերը,
– Ճնշում գործադրելու համայնքային ինստիտուտների վրայ,
– Եւ ամենասարսափելին՝ ապակայունացնելու իրավիճակը համայնքում՝ արհեստական լարուածութիւն ստեղծելով։
Սա այլեւս ոչ թէ քաղաքական անհամաձայնութիւն է, այլ՝ պետականութեան համար վտանգաւոր քաղաքական վարքագիծ։
Պէտք է յստակ ընդգծել՝ քաղաքական մրցակցութիւնը պէտք է առաջնորդուի օրէնքով եւ քաղաքացիական պատասխանատուութեամբ։ Նման ապակայունացման փորձերը ոչ միայն անտեսում են ժողովրդի ընտրութիւնը, այլեւ ապակայունացնում են պետական ինստիտուտների աշխատանքը՝ հասցնելով անմիջական վնաս համայնքի բնակիչներին։
Հետեւաբար այսօրուայ իրողութիւնը պահանջում է`
– Անմիջապէս դադարեցնել՝ որեւէ ձեւով խոչընդոտել համայնքապետարանի եւ տեղական իշխանութեան աշխատանքը,
– Զերծ մնալ ցանկացած քայլից, որը կարող է միտումնաւոր սրել լարուածութիւնը կամ խաթարել քաղաքի սոցիալ-տնտեսական ծրագրերը,
– Ցուցաբերել քաղաքական հասունութիւն՝ յարգել ժողովրդի ընտրութիւնը եւ ծառայել բացառապէս համայնքի շահերին։
– Եւ թոյլ չտալ, որ մի ամբողջ քաղաք դառնայ «Քաղաքացիական պայմանագիր» կուսակցութեան նեղ շահերի գերի։
Պարտութիւնը երբեք դիւրին չի լինում։ Բայց պարտութիւնը քաղաքական մշակոյթի բացակայութեան պայմաններում վերածւում է ապակառուցողական եւ վտանգաւոր քաղաքականութեան:
Գիւմրին ունի ընտրուած ղեկավարութիւն, որի առաքելութիւնն է՝ ծառայել քաղաքին։
Եւ այդ առաքելութեան ճանապարհին խոչընդոտելն արդէն բացարձակ անպատասխանատուութիւն է պետականութեան նկատմամբ։
Մհեր Մելքոնեան
ՀՅԴ Շիրակի Մարզային կոմիտէի ներկայացուցիչ, ԱԺ «Հայաստան» խմբակցութեան պատգամաւոր
