Ինձ մշտապես փորձել են կապել որոշ սպանությունների հետ, մասնավորապես Քանաքեռում հայտնի Տույ մականունով անձի սպանության դեպքի հետ, որ ես այդ օրը եղել եմ դեպքի վայրում կամ եղել եմ մեքենայի մեջ, ու ես կապ ունեմ սպանության հետ, որի հետ կապված ես դեռևս 2022 թվականին դիմել եմ դատարան՝ պահանջելով հերքում և վնասի փոխհատուցում, քանի որ այդ նյութով արատավորվել է իմ բարի համբավը: Այս մասին այսօր լրագրողների հետ զրույցում հայտարարեց ԱԺ ՔՊ–ական պատգամավոր Հայկ Սարգսյանը։
«Ես այդ օրը չեմ եղել Հայաստանում. այդ օրը ես եղել եմ զորավարժությունների, ՌԴ Կազան քաղաքում: Առկա են դրա հետ կապված մամուլի հաղորդագրություններ, լուսանկարներ ՀԱՊԿ-ի պաշտոնական կայքում։
Ես այդ անձին տեսել եմ դրանից երեք տարի առաջ մեկ անգամ պատահաբար, որովհետև մեր երկիրը փոքր երկիր է, հյուրանոցում պատահաբար տեսել եմ այդ անձին 2018 թվականին։ Մոտեցել է, ծանոթացել ենք, դա եղել է մեր առաջին և վերջին հանդիպումը։ Ես այդ անձի հետ որևէ կապ չեմ ունեցել։ Այսինքն՝ 2022 թվականի դրությամբ չորս տարի այդ անձին երբևէ չեմ տեսել, որևէ հարաբերություն չեմ ունեցել։ Ինձ փորձել են կապել այդ անձի սպանության հետ, որպեսզի փորձեն ինձ վարկաբեկել, արատավորել, որպեսզի ես իմ օրենսդրական գործունեության մեջ լինեմ կաշկանդված և չկարողանամ իմ օրենքի նախագծերը արդյունավետ առաջ տանել։ Բարեբախտաբար դրանք չի հաջողվել։
Բայց սա կապված է մեր դատական համակարգի խնդիրների հետ։ Օրինակ՝ ես երբ 2022 թվականին դիմել եմ հայցով։ Եթե արագ տեմպով դատաքննություն տեղի ունենար, և դատարանը պարտավորեցներ հատուցել իմ վնասը, վճարել գումարը և ներողություն խնդրել ինձ զրպարտելու համար, հետագայում նման դեպքերից կփորձեինք խուսափել»,–ասաց նա։
Հայկ Սարգսյանն անդրադարձավ նաև մեկ այլ դեպքի։
«Մի քանի ամիս առաջ՝ իմ վերջին օրենսդրական նախաձեռնությունից հետո, երբ ինձ հաջողվեց երկու անգամ բարձրացնել խաղային ոլորտի տուրքերը, սրա արդյունքում տարեկան շուրջ 30 միլիոն դոլար հավելյալ գումար է մուտքագրվելու պետական բյուջե, դրանից հետո ինձ փորձեցին կապել Կարեն անունով անձի ինքնասպանության հետ։ Տվյալ անձին երբևէ չեմ տեսել և առաջին անգամ իր մասին լսել եմ այդ հրապարակումների մեջ։ Նշել են, թե իբր ես եմ հասցրել ինքնասպանության, որ մենք ունեցել ենք դատական ինչ-որ վեճեր, կամ ես փորձել եմ իրենից ինչ-որ բան խլել։ Նշեմ, որ այդ անձին երբևէ նույնպես չեմ ճանաչել։ Ես դիմել եմ այս հարցով վարչական դատարան, որպեսզի վնասի փոխհատուցում պահանջեմ։
Դուք գիտեք, որ ես տարեսկզբին շրջանառության մեջ էի դրել օրենքի նախագիծ, որով առաջարկում էի խստացնել պատիժները թմրանյութերի ապօրինի շրջանառության համար՝ հատկապես խոշոր չափերով թմրանյութերի իրացման համար նախատեսել մինչև ցմահ ազատազրկում։ Նախագիծը քննարկվեց, կային դեմ կարծիքներ, և այս պահի դրությամբ դեռևս չի ընդունվել։
Այդ նույն շրջանակները ինձ փորձում են հաճախ կապել թմրանյութերի բիզնեսի հետ, որի հետ ես բնականաբար չեմ կարող առնչություն ունենալ, և անտրամաբանական կլիներ, եթե ես նման բիզնեսի հետ առնչություն ունենայի և նման օրենքի նախաձեռնությամբ հանդես գայի»,–ասաց Հայկ Սարգսյանը։
