Ադրբեջանի տնտեսությունը կոլապսի մեջ

ԱՄՆ-ի նավթարդյունաբերական սանկցիան

«Ղարաբաղ» նավթատարը անշարժ՝ ամերիկյան ափամերձ ջրերում

Երեկ առավոտվանից միջազգային լրատվամիջոցները տժժում են, իսկ մերոնք՝ ինչպես միշտ՝ Նիկոլն ասաց, կրկնօրինակները կրկնեցին, «Իրական Հայաստան», կառուցելու ենք, Մկո, եւայլն, եւայլն: Իսկ իրական-սուտական Ադրբեջանում իսկական խուճապ է փողոցներում, խանութներում, բանկերում… Ամեն մարդ ջանում է կրճատել ծախսերը, խնայել հնարավորինս, արված ներդրումները նվազեցնել, չարվածները չեղարկել: Բանկերը անհատներին տարադրամ չեն տալիս պաշտոնական որոշմամբ, պետական պարտատոմսերը սառեցված են: Չեղարկվել են ապրանքների ներմուծման ապսպրանքները, կրճատվում են աշխատակազմեր, նախատեսվում է գործազրկության աճ՝ հատկապես նավթարդյունաբերության ոլորտում:

Խուճապի մեջ է նաեւ կառավարությունը: Տնտեսական, ֆինանսական, նավթարդյունաբերական նախարարություններն ու մասնագիտական խմբերը անդուլ նիստեր են գումարում տնտեսությունը ոտքերի վրա պահելու քայլեր ձեռնարկելու, նավթաշուկայում նոր հաճախորդներ ներգրավելու, նավթի մատակարարման այլ ուղիներ գտնելու համար, քանի որ նավթատար տանքերներին այլեւս հյուրընկալ չեն վերաբերվում ծովային բոլոր տերմինալներում, ինչպես՝ լկտիաբար «Ղարաբաղ» անունը կրող թանքերը, որն անգործ՝ այժմ ծփում է ամերիկյան ափամերձ ջրերում, լեփ-լեցուն վառելիքով:

Բնականաբար, ամենասաստիկ իրարանցումը տիրում է միջազգային բորսաներում: Միլիոնավոր արժեթղթեր են վաճառվում էժան գներով, ինչն իր ազդեցությունն է գործում, անշուշտ, մնացյալ նավթարդյունահանող երկրների ու կորպորացիաների վրա, առաջին հերթին՝ British Petrolium-ի՝ բրիտանական նավթային հսկայի վրա, որը, ինչպես հայտնի է, սերտագույն համագործակցության մեջ է ադրբեջանական Socar-ի հետ եւ նավթագազային տարափոխադրման հանգույցների, զտարանների, խողովակագծերի եւ հանքահորերի վրա: Թեեւ վերջին ամիսներին, ինչպես եվրոպական այլ երկրներ, դժգոհ էր ադրբեջանական նավթի որակից:

Արդ, ծանր, շատ ծանր հարված է ստացել Ադրբեջանի գոռոզ, խաբեբա, կաշառատու եւ կաշառասուն բռնապետը: Հարված՝ այն մարդու կողմից, որի մոտ նա եղել էր ընդամենը մեկուկես ամիս առաջ, օգոստոսի 8-ին, հայաստանցի իր վախկոտ ու ենթակա գործընկերոջ հետ՝ իբր խաղաղության դաշն կնքելու, եւ, օգտվելով առիթից, քծնողաբար նրա թեկնածությունը առաջադրելու Նոբելյան Խաղաղության մրցանակի համար, ինչը, ինչպես գրել ենք azg.am մեր կայքէջում, Նոբելյան հանձնաժողովի ուշադրության չարժանացավ ու մերժվեց:

Այո, Մ. Նահանգների նախագահ Թրամփն է, հաշվի առնելով իր համապատասխան հիմնարկի հանձնարարականը, պատժամիջոցներ (սանկցիաներ) սահմանել Ադրբեջանի դեմ՝ նավթային շուկայում խարդավանքներ իրականացնելու համար, որից, ի դեպ, դժգոհ են մնացել շահառու որոշ երկրներ, այդ թվում՝ Թուրքիան, սակայն մեղմ արտահայտություններով, մինչ ուրիշ երկրներ սկսել են բանակցություն վարել Թյուրքմենստանի հետ՝ իրենց անհրաժեշտ պաշար նավթը ապահովելու համար:

Ըստ մասնագետների, պատժամիջոցները ադրբեջանական տնտեսությանը կբերեն ավելի քան 1-3-րդի կորուստ եւ տեւական ազդեցություն կունենան այդ երկրի վրա:

Այս բոլորից հետո արժե հարց տալ Ն. Փաշինյանին, թե կշարունակի՞ Ադրբեջանով սպառնալ մեր ժողովրդին:

ՀԱԿՈԲ ԱՎԵՏԻՔՅԱՆ