Հայաստանում այս փուլում երեք տասնյակ քաղբանտարկյալ կա, ինչը խոսում է ռեժիմի բռնատիրական մոտեցումների մասին, լրագրողների հետ զրույցում այսօր ասաց ԱԺ «Պատիվ ունեմ» խմբակցության պատգամավոր Տիգրան Աբրահամյանը։
Նրա խոսքով՝ մեր որոշ հայրենակիցներ թեև բանտերում չեն, սակայն ենթարկվում են քաղաքական հետապնդման։
Անդրադառնալով Բաքվում Կարմիր խաչի գրասենյակի փակման թեմային՝ Տիգրան Աբրահամյանը նկատեց՝ դա անչափ մտահոգիչ գործընթաց է։
«Այս միջազգային կազմակերպության դերն ու նշանակությունը հասկանալու համար պետք է հասկանալ, որ այն փաստացի միակ միջազգային կազմակերպությունն էր, որը հնարավորություն ուներ այցելելու ադրբեջանական բանտերում պահվող մեր հայրենակիցներին, իմանալու նրանց վիճակը։ Սա նաև զսպող միջոց էր նրանց նկատմամբ ճնշումները նվազեցնելու։ ԿԽՄԿ-ն մեր գերիների և նրանց հարազատների համար եղել է նաև հույսի հնարավորություն։
Ադրբեջանը հաստատել է 23 հայերի ներկայությունն իր բանտերում, սակայն տարբեր փաստերով խոսք է գնում 8 տասնյակ հայ գերիների մասին։ Չհաստատված գերիների հարազատներն այսօր էլ դիմում են միջազգային տարբեր ատյանների՝ տեղեկություն ստանալու իրենց հարազատների մասին։ Իսկ չհաստատվածությունն ավելի մեծ սպառնալիքներ է ստեղծում գերիների համար»,- ասաց պատգամավորը։
Ըստ նրա՝ ՀՀ իշխանությունները որևէ լուրջ քայլ չեն ձեռնարկել՝ կոմպենսացնելու Բաքվում ԿԽՄԿ գրասենյակի փակումը, վերահասցեագրելու Բաքվում պահվող հայ գերիների խնդիրը։
«Ամեն ձևով փակվում է հայ գերիների մասին տեղեկատվությունը։ Ադրբեջանը գերիների թեման այս փուլում որպես խաղաքարտ ավելի ընդգծված է շահարկելու, Հայաստանի դեմ գերի հարցըը կիրառելու է որպես ճնշման միջոց»,- ասաց պատգամավորը։
