Օգոստոսի 8-ին Ամերիկայի մայրաքաղաքում կայացած հանդիպումից հետո Հայաստանի ղեկավարությունը ամենաբարձր մակարդակով տեղեկացրել է ռուսական կողմին այնտեղ ձեռք բերված պայմանավորվածությունների մասին: Այս մասին ճեպազրույցի ժամանակ ասել է Ռուսաստանի Արտաքին գործերի նախարարության պաշտոնական ներկայացուցիչ Մարիա Զախարովան:
Նա, մասնավորապես, նշել է. «Ռուսաստանի համար կարևոր է, որ խաղաղության գործընթացները լինեն կայուն և երկարաժամկետ՝ հաշվի առնելով Հարավային Կովկասի բոլոր երկրների և հարևանների շահերը: Արտատարածաշրջանային խաղացողների ներգրավումը չպետք է սնուցի տարածաշրջանի կոնֆլիկտային ներուժը կամ ստեղծի նոր բաժանարար գծեր դրանում:
Այս մոտեցումը լիովին վերաբերում է տարածաշրջանային տրանսպորտային հաղորդակցությունների ապաշրջափակմանը: Լոգիստիկ երթուղիների սահուն և համապարփակ գործունեությունը պահանջում է ներգրավված բոլոր երկրների շահերի ներդաշնակեցում:
Ռուսաստանի, Հայաստանի և Ադրբեջանի միջև եռակողմ համաձայնագրերը, որոնք ձեռք են բերվել 2020-2022 թվականներին տարածաշրջանային տնտեսական կապերի ապաշրջափակման համատեքստում, մնում են արդիական: Կողմերից ոչ մեկը չի հրաժարվել դրանցից: Մասնագիտացված եռակողմ աշխատանքային խմբի ձևաչափով կատարվել է հսկայական աշխատանք, և ձեռք են բերվել կոնկրետ արդյունքներ: Սակայն ոչ մեկին դեռևս չի հաջողվել ավելիին հասնել»:
