Աջարիայի Քոբուլեթի քաղաքում 24-ամյա հայ երիտասարդy ջրահեղձ է եղել։ Այդ ժամանակ տարածքում ոչ մի փրկարար չի եղել. ֆեյսբուքյան գրառմամբ հայտնել է Սերգեյ Հակոբյանի նշանածը՝ Արիանա Գրիգորյանը։
Նա իր գրառման մեջ, մասնավորապես, նշել է․ «Ես Արիանա Գրիգորյանն եմ՝ 24-ամյա Սերգեյ Հակոբյանի նշանածը։ Ուզում եմ, որ բոլորը դադարեն սուտ լուրերի տարածումը։
Ինձ ոչ ոք չի փրկել․ ես ինքս եմ դուրս եկել ջրից։ Ավելին ասեմ՝ նորից հետ եմ նետվել ջուրը, որ կարողանամ նաև իրեն փրկել։ Երբ մենք ջուրն ենք մտել, ալիքներն այդքան շատ չեն եղել․ միանգամից է ուժեղացել։ Իսկ այդ պահին ոչ մի փրկարար մոտակայքում չի եղել, որ օգնության գար․ նրանք շատ ուշ են եկել։ Խնդրանքս և աղաչանքս՝ դադարեք սուտ լուրերի տարածումը»։
Հիշեցնենք, որ վրացական աղբյուրների վրա հիմնվելով՝ տեղի լրատվամիջոցները հաղորդել են, որ օգոստոսի 27-ին Քոբուլեթիում հայ տղամարդ է ծովում խեղդվել։ Վրացական աղբյուրները նաև տեսանյութ են հրապարակել։ Պարզվել է, որ ջրահեղձ եղած երիտասարդը 24-ամյա Սերգեյ Հակոբյանն է, Կոտայքի մարզի Գառնի գյուղից։ նա մասնակցել էր 44-օրյա պատերազմին։
