Այսօր՝ ԲԴԽ նիստից հետո, լրագրողները փորձեցին Երևանի քրեական դատարանի դատավոր Մասիս Մելքոնյանին հարցեր ուղղել։ Լրագրողները մասնավորպես ցանկանում էին տեղեկանալ վերջին շրջանում նրա կողմից Բագրատ արքեպիսկոպոս Գալստանյանին և Միքայել արքեպիսկոպոս Աջապահյանին կալանավորելու, ինչպես նաև այն մասին, որ երբ քաղաքական հնչեղ գործերը մակագրվում են Մելքոնյանին, փաստաբանները կանխատեսում են, որ այդ անձինք կալանավորվելու են։
Մասիս Մելքոնյանը, սակայն, հրաժարվեց հարցերին պատասխանել։
«Չէ, չեմ ուզում։ Գնացեք, որոշումները կարդացեք, պատճառաբանությունները լսեք։ Չեմ ցանկանում պարզաբանել։ ԲԴԽ-ն ունի մամուլի խոսնակ. դիմեք, ստացեք պատասխաններ։ Ես հարցերի չեմ պատասխանում»,- ասաց Մելքոնյանը՝ հավելելով, որ լրագրողներն էթիկայի նորմեր են խախտում. ինքը չի պատասխանում, մինչդեռ ԶԼՄ ներկայացուցիչներն իր կողքով վազում և հարցեր են տալիս։ «Սա փողոց ա, մարդիկ նայում են։ Չեմ ուզում խոսեմ։ Դիմեք Բարձրագույն դատական խորհուրդ»,- կրկին ասաց նա և շտապեց հեռանալ։
