Հունիսի 14-ին Գդանսկում (Լեհաստան) տեղի ունեցած Մոցարտի անվան Միջազգային երաժշտական մրցույթում հայաստանցի 20-ամյա դաշնակահար Դերեն Բրաթյանը արժանացել է Ոսկե մրցանակի: Նա կատարել է Կոմիտաս-Սարաջյանի «Կռունկը»: Նրա երկացանկում ոչ միայն համաշխարհային եւ հայ երաժշտության դասականների բազմաթիվ ստեղծագործություններ են, այլեւ ջազ, բլյուզ, ռոքնռոլ եւ ժամանակակից կոմպոզիտորների գործեր: Դրանց մեջ է նաեւ երեւանցի երիտասարդ կոմպոզիտոր Մաննե ֆոն Էմի «Ave Verum Corpus» ստեղծագործությունը, որը հնչել է երեւանյան տարբեր համերգներում: Դաշնամուրի եւ ձայնի համար գրված այս դուետը (սոպրանո՝ Լիլյա Հովհաննիսյան) գրված է լատիներեն աղոթքի հիման վրա: Այս երաժշտության կատարմանն ու Դերենի վերջին գործունեությանն անդրադարձել է ամերիկյան «Canvas Rebel» պարբերականը: Իսկ շուտով Երեւանում կկայանա Դերեն Բրաթյանի ձայնագրած հայկական մեղեդիների դաշնամուրային կատարումներ ընդգրկող ալբոմի շնորհանդեսը, որտեղ ընդգրկված են հայ ժողովրդական հայտնի երգեր, Կոմիտասի, Բաբաջանյանի ստեղծագործություններից:
Դերեն Բրաթյանը ծնվել է Թեհրանում, հայրենասեր եւ արվեստասեր ընտանիքում: Դաշնամուր նվագել է մանկուց՝ շնորհիվ տատիկի: Մրցանակակիր է դարձել Թեհրանի արվեստի ակադեմիայի կազմակերպած մրցույթում: Հայրենիքի հանդեպ սերը նրան մշտական բնակության է բերել Հայաստան, որտեղ էլ այժմ ստանում է բարձրագույն երաժշտական ուսումը Կոմիտասի անվան կոնսերվատորիայում (Մարինե Մարգարյանի դասարան): Դերենն ակտիվ է ձայնագրություններով, համերգներով, տարբեր ստեղծագործությունների առաջնախաղերի կատարմամբ:
ՄԱՆԵ ԲԱՂԴԱՍԱՐՅԱՆ
