Կոնյակի սպիրտ արտահանող որոշ ավտոմեքենաներ բաց են թողնվել, բայց, ցավոք սրտի, խնդիր լուծված չէ, որովհետև խնդիր լուծում՝ նշանակում է ինստիտուցիոնալ հասկանալ, թե ինչն է պատճառը։ Այս մասին այսօր լրագրողների հետ զրույցում նշեց Էկոնոմիկայի նախարար Գևորգ Պապոյանը՝ անդրադառնալով փաստին, որ դեպի ՌԴ կոնյակի սպիրտ արտահանող հայկական բեռնատարները վրացական սահմանին կանգնեցվում են, նմուշառում է կատարվում, և կոնյակն ուղարկվում է ստուգման։ Ընդ որում՝ սա այն դեպքում, երբ կոնյակի խմբաքանակը նախատեսված չէ վրացական շուկայի համար, Վրաստանը պարզապես տարանցի երկիր է։
«Այստեղ անկեղծ պիտի լինեմ, պատճառները մեզ համար անհասկանալի են, փորձում ենք բոլոր մակարդակներում խնդրին լուծում գտնել։ Ուզում եմ նշել, որ առաջիկա օրերին ունենք նախնական պայմանավորվածություն. թերևս ես կայցելեմ Վրաստան՝ հարցերը արդեն տեղում լուծելու, հասկանալու համար»,- հայտարարեց նախարարը։
