Այսօր անակնկալների պակաս չեղավ ԳԴՀ -ում: Կեսօրից հետո պարզ դարձավ, որ այսօր՝ մայիսի 6-ին առաջին փուլով կանցլերի պաշտոնում չընտրված Ֆրիդրիհ Մերցը ուզում է երկրորդ փուլում էլ առաջադրվել: Նրա հենարան քրիստոնյա դեմոկրատական քրիստոնյա սոցիալական միության անդամների, նաեւ կոալիցիոն գործընկեր սոցիալ դեմոկրատների որոշմամբ, Բունդեսթագը հենց այսօր ընտրության երկրորդ փուլի նիստ գումարեց: Մինչ ընդդիմությունը քննարկում էր երկրի պատմության մեջ աննախադեպ՝ կանցլերի թեկնածու Մերցի առաջին փուլով չընտրվելու «խայտառակությունը», «Այլընտրանք Գերմանիայի համար» ծայրահեղ աջ կուսակցության անդամները պահանջում էին Գերմանիայում նոր ընտրություններ անցկացնել, կոալիցիոն գործընկերները որոնում էին, թե ով է իրենց մեջ, ներսում 18 ձայնի պակասով խառնել դաշնային հանրապետության մայիսի 6-ի քաղաքական օրակարգը, վճռվեց՝ այսօր է ընտրվում ԳԴՀ նոր կանցլերը: Եվրոպան եւ աշխարհը դիտում են, եւ Գերմանիան իրավունք չունի հապաղելու:
Մինչ ժամը 15-ը վերահաստատվեց, որ Քրիստոնյա դեմոկրատական քրիստոնյա սոցիալական միության կանցլերի թեկնածուն անփոփոխ Մերցն է մնում, կոալիցիայի մաս կազմող սոցիալ դեմոկրատական կուսակցությունն էլ ուրիշ թեկնածու չի առաջադրում: Ժամը 16 անց 15-ին Բունդեսթագի նախագահ Յուլյա Քլյոքները հայտարարեց ընտրության երկրորդ փուլի արդյունքը՝ 325 ձայնով (հավելյալ 9 ձայնով) Ֆրիդրիհ Մերցը ԳԴՀ կանցլեր ընտրվեց: Նրա թեկնածությանը դեմ է եղել 289 պատգամավոր, 1 պատգամավոր ձեռնպահ է քվեարկել: Ժամը 16 անց 43-ին Մերցին կանցլերի պաշտոնում հաստատեց ԳԴՀ նախագահ Ֆրանկ Վալտեր Շթայնմայերը: ԳԴՀ նախարարներին նախագահական Բելվյու դղյակում ընդունեց ԳԴՀ նախագահը, այնուհետ Բունդեսթագում կկայանա երդմնակալության արարողությունը, որ նախատեսված է մայիսի 6-ին ժամը 18 անց 15-ին:
Այսօր կեսօրից առաջ իրազեկել էինք, թե Գերմանիայի պատմության մեջ առաջին անգամ կանցլերի հավանական թեկնածուն՝ Քրիստոնյա դեմոկրատ Ֆրիդրիհ Մերցը Բունդեսթագում այսօր՝ մայիսի 6-ին կայացած փակ գաղտնի քվեարկության արդյունքով՝ 316-ի փոխարեն 310 ձայն ստանալով, չկարողացավ կանցլեր դառնալ: Բունդեսթագի նախագահ Քլյոքները քվեարկության արդյունքի մասին հայտարարեց 10 անց 6-ին: Այս պահին Բունդեսթագում չկա որեւէ պատգամավոր, բոլորը լքել են նիստերի դահլիճը, քննարկում են, թե ինչպես սա հնարավոր դարձավ, երբ շաբաթներ շարունակ կոալիցիոն բանակցություններ էին վարում, դրանք հաջող որակելով: Ըստ սահմանադրության Բունդեսթագը 14 օրվա ընթացքում պիտի նիստ գումարի, նոր ընտրություն լինի: Քննարկվում է եւ հավանական է, որ Բունդեսթագի նիստը կլինի հենց վաղը՝ մայիսի 7-ին, թեկնածուն Ֆրիդրիհ Մերցն է:
ԱՆԱՀԻՏ ՀՈՎՍԵՓՅԱՆ, Գերմանիա
