Մոսկվայի դատարանն ապրիլի 21-ին Միխայիլ Խաչատուրյանի հետմահու քրգործով վերջնական որոշում կհրապարակի
Ապրիլի 21-ին Մոսկվայի Բուտիրսկի դատարանը վերջնական որոշումը կհրապարակի Միխայիլ Խաչատուրյանի քրեական գործով, որին հետմահու մեղադրանք է առաջադրվել դուստրերի նկատմամբ ծանր մարմնական վնասվածք հասցնելու և սեռական բռնության համար. ՏԱՍՍ-ին հայտնել է աղջիկներից մեկի փաստաբան Ալեքսեյ Պարշինը։
«Երկուշաբթի՝ ժամը 12-ին, վերջնական որոշում կլինի Միխայիլ Խաչատուրյանի գործով»,- ասել է գործակալության աղբյուրը։
Ավելի վաղ պետական մեղադրող կողմը խնդրել էր Մոսկվայի Բուտիրսկի դատարանին՝ ճանաչել Խաչատուրյանի մեղքն ապացուցված և դադարեցնել նրա մահվան կապակցությամբ քրեական հետապնդումը։ Պետական մեղադրող կողմը վերականգնման կամ գործը վերահսկող մարմնին վերադարձնելու հիմքեր չի տեսել։ Տուժող կողմի պաշտպանը համաձայնել է դատախազի դիրքորոշման հետ։
Խաչատուրյանի դեմ հարուցված քրեական գործը երեք դատավորների կողմից դռնփակ քննվում էր գրեթե երկու տարի։ Բացի Պարշինից, քույրերին դատարանում ներկայացնում են փաստաբաններ Մարի Դավջաթյանը, Յարոսլավ Պակուլինը և Սվետլանա Դավիդովան։
Մահացածի հարազատները պնդում են, որ աղջիկների հայրն անմեղ է։
Ավելի վաղ նախաքննությունը խստացրել էր մեղադրանքը՝ լրացուցիչ մեղադրանք առաջադրելով դուստրերի կողմից սպանված Խաչատուրյանին՝ սիստեմատիկ և դիտավորությամբ ծանր մարմնական վնասվածք հասցնելու համար։ Աղջիկների փաստաբանները ՏԱՍՍ-ին հայտնել են, որ իրենց պաշտպանյալները գործով պաշտոնապես տուժող են ճանաչվել։ Եթե նրանց հայրը մեղավոր ճանաչվի, ապա դա ապացույց կլինի, որ քույրերն ուղղակի ինքնապաշտպանության են դիմել։
Բացի այդ, գործով չորրորդ տուժողը աղջիկների ընկերն է, որին, ըստ մեղադրական եզրակացության, Խաչատուրյանը պոռնոգրաֆիկ տեսանյութեր է ուղարկել։
