Տավուշցի լրագրող Ոսկան Սարգսյանը գրում է. «Մինչ ընդդիմությունը Նիկոլ Փաշինյանին ներկայացնում է որպես հոգեպես անհավասարակշիռ, դեղեր խմող վարչապետի, Նիկոլ Փաշինյանը փայլուն կերպով է կատարում իր իշխանության ,պաշտոնի երկարաձգումը։ Նիկոլ Փաշինյանը , ի տարբերություն ընդդիմության, ակտիվ, հետևողական կերպով պատրաստվում է խորհրդարանական հերթական կամ արտահերթ ընտրություններին։
Նա Հայաստանի շատ համայնքներում, որտեղ ՏԻՄ ընտրություններում ՔՊ-ն պարտվել է, տարբեր ձևերով՝ համայնքապետերի վրա քրեական գործեր հարուցելով, համայնքի ավագանու ընդդիմադիր անդամներից ոմանց ՔՊ-ի ճամբար տեղափոխելով՝ կարողացել է համայնքապետարաններում իշխանությունը դարձնել ՔՊ-ական։ Այդ համայնքներից են Վանաձորը,Ալավերդին, Գյումրին և բազում այլ համայնքներ։ Նիկոլ Փաշինյանի կառավարության հրահանգով 2024թ․ դեկտեմբերի 1-ից Հայաստանի համայնքապետարաններին արգելված է սոցիալապես անապահով բնակիչներին դրամական աջակցություն ցուցաբերել, մինչդեռ մարզպետարանների միջոցով կարիքավորներին միլիոնավոր դրամների աջակցություն է ցուցաբերվում։
2025թվականին Տավուշի մարզպետարանը պետական բյուջեով «Այլ նպաստներ բյուջեից» հոդվածով 67 միլիոն 547 հազար դրամ ֆինանսական օգնություն է տրամադրելու մարզի կարիքավորներին։ Բողոքներ եմ ստացել, որ Տավուշի մարզպետարանը անհիմն կերպով մերժել է մարզի կարիքավորներին դրամական օգնություն տրամադրել, դրանք տրամադրելով նրանց, ում համապատասխան հանձնաժողովի անդամները անձնապես ծանոթ են։ Կարող եմ մտածել, որ այդ գործում առկա է ԽԾԲ-ի հին սկզբունքը։
Տավուշի մարզի հանրակրթական պետական 76 դպրոցներից 18-ը այժմ տնօրեն չունի, Դիլիջանի պետական բազմագործառնութային քոլեջում տնօրենի թափուր հաստիքի համար 2 անգամ մրցույթ հայտարարվել, սակայն լիազոր մարմնի՝ ԿԳՄՍ-ի ներկայացուցիչը չի ներկայացել դրան, մրցույթները չեն կայացել։ Սևան քաղաքի բազմագործառնութային քոլեջի տնօրենի թափուր տեղի համար վերջին մեկ տարում 10-ից ավելի մրցույթներ են հայտարարվել, սակայն ամեն անգամ լիազոր մարմնի՝ ԿԳՄՍ-ի ներկայացուցիչը չի ներկայացել, մրցույթները չեն կայացել։ Կրթության ոլորտի մեր աղբյուրները հայտնում են, որ հանրակրթական պետական դպրոցների ու պետական քոլեջների տնօրնների հաստիքները թափուր են թողնում, որպեսզի ԱԺ ընտրություններից առաջ այդ պաշտոնի հավակնորդներին ստիպեն ՔՊ-ի համար շատ ձայներ հավաքել»։
