Դեռ հարց է՝ իրականությանը համապատասխանո՞ւմ է ՀՀ փոխարտգործնախարար Պարույր Հովհաննիսյանի այն հայտարարությունը, որ Բաքվում պահվող հայ գերիների հարցը ՀՀ ԱԳՆ օրակարգում է։ Քանի որ այդ անձը ծառայում է Նիկոլ Փաշինյանին, չի բացառվում, որ ինչպես Փաշինյանն է տոտալ կեղծարար ու ստախոս, այնպես էլ նրան ծառայողները։ Azg.am-ի թղթակցի հետ զրույցում նման տեսակետ հայտնեց քաղաքագետ Գագիկ Համբարյանը՝ անդրադառնալով Պարույր Հովհաննիսյանի այն հայտարարությանը, որ Բաքվում պահվող հայ գերիների հարցը ՀՀ ԱԳՆ օրակարգում է, բայց իրականացվող կոնկրետ քայլերը գոհացուցիչ չեն։
«Իսկ ի՞նչ ապացույցներ կներկայացնի ԱԳ փոխնախարարը, որ գերիների հարցն իրենց օրակարգում է, կամ որ իրենք զբաղվում են այդ հարցով։ Երբ այս իշխանության ներկայացուցիչները հայտարարում են, որ դիվանագիտությունն ունի փակ և կուլիսային գործընթացներ, նշանակում է՝ նրանք ընդհանրապես գործ չեն անում և փորձում են իրենց ստորաքարշությունը թուրք-ադրբեջանական տանդեմի առջև բացատրել նրանով, որ իրենք իբրև թե գործ են անում, բայց՝ կուլիսային։
Նույն կեղծարարությամբ զբաղված էին նաև այն ժամանակ, երբ Ռուսաստանի, Վրաստանի, ԵՄ-ի և ԱՄՆ-ի անմիջական ջանքերով հայ գերիներ էին ազատվում, և այդ ամենը Փաշինյանի վարչակազմը փորձում էր իրեն վերագրել՝ իբրև իրենք են բանակցել։
Վերջին դեպքն էլ, հիշում ենք, 2023 թվականին դեկտեմբերին էր, երբ Փաշինյանը երկու մարդասպան ադրբեջանցի դիվերսանտներին ուղղակի նվիրեց Բաքվին, ինչից հետո մոտ 3 տասնյակ գերի ազատ արձակվեց։ Դրանից հետո այս վարչախումբն առանց ամոթի հպարտանում էր, որ այդքան գերիների են ազատել։ Այսինքն՝ գերիներին մարդասպանների դիմաց։ Դա ամենացածրակարգ որոշումն էր, որը կարող էր ընդունել պետության ղեկավարը»,- ասաց Գագիկ Համբարյանը։
Ըստ քաղաքագետի՝ այն, որ Պարույր Հովհաննիսյանը հայտարարում է՝ գերիների հարցն ԱԳՆ օրակարգում է, ամենևին չի նշանակում, որ ճիշտ է ասում կամ ՀՀ քաղաքացին պարտավոր է նրան հավատալ։
«Իսկ ո՞վ է ասել, որ Ադրբեջանը բանի տեղ է դնում ՀՀ պետական մարմիններին։ Բաքուն վերջին 4.5 տարվա ընթացքում բազմիցս ցույց է տվել, որ արհամարհում է ՀՀ վարչապետին, և եթե անգամ գերիների վերադարձի հարցն օրակարգում լինի, Ադրբեջանը թքած ունի ԱԳՆ օրակարգի վրա։
Նիկոլ Փաշինյանի առաջարկներից գոնե մեկն ընդունվե՞լ է Բաքվի կողմից. իհարկե ոչ։ Այդ մարդը, 4.5 տարի լիզելով Ադրբեջանի նախագահի կոշիկները, շարունակում է ղեկավարել Հայաստանը, և նույն կարգավիճակն էլ ունի ԱԳՆ-ը։ Իսկ պարույր հովհաննիսյանները թող շատ չուրախանան, որ ՀՀ քաղաքացիներն իրենց բոլոր ասածները պետք է հալած յուղի տեղ ընդունեն»,- նշեց մեր զրուցակիցը։
Ամփոփելով՝ Գագիկ Համբարյանը շեշտեց՝ հայ գերիներին Ադրբեջանին հանձնել է Նիկոլ Փաշինյանը, երբ 2022 թվականի հոկտեմբերի 6-ին Ֆրանսիայի նախագահ Էմանուել Մակրոնի և ԵԽ նախագահ Շառլ Միշելի հետ Պրահայում ստորագրում էր Արցախն Ադրբեջանի մաս ճանաչելու մասին փաստաթուղթը։
Հիշեցնենք, որ ՀՀ ԱԳ փոխնախարար Պարույր Հովհաննիսյանն այսօր ԱԺ եվրոպական ինտեգրման հարցերի մշտական հանձնաժողովի արտահերթ նիստի ժամանակ հայտարարել էր՝ Բաքվում պահվող հայ գերիների հարցը ՀՀ ԱԳՆ օրակարգում է, բայց իրականացվող կոնկրետ քայլերը գոհացուցիչ չեն։
