Ադրբեջանի նախագահ Իլհամ Ալիևը հավանություն է տվել Ռուսաստանի հետ «Հյուսիս-Հարավ» միջանցքով տարանցիկ բեռնափոխադրումների զարգացման գործում համագործակցության մասին միջկառավարական համաձայնագրին։ Փաստաթուղթը ստորագրվել է Մոսկվայում 2024 թվականի դեկտեմբերի 21-ին։
Համաձայնագրին հավանություն տալու մասին հրամանագիրը հրապարակվել է Ադրբեջանի նախագահի կայքում։ Փաստաթղթում նշվում է, որ համաձայնագրի դրույթների իրականացումը վստահվել է երկրի թվային զարգացման եւ տրանսպորտի նախարարին։ Ադրբեջանի ԱԳՆ-ն պետք է Մոսկվային տեղեկացնի նախագծի ուժի մեջ մտնելու համար անհրաժեշտ ներքին ընթացակարգերի ավարտի մասին։ Ռուսական կողմը դեռ չի հաստատել համաձայնագիրը, գրում է «Коммерсантъ»-ը։
«Հյուսիս-Հարավ» տրանսպորտային միջանցքի կառուցման մասին պայմանագիրը ստորագրվել է 2000 թվականին Ռուսաստանի, Իրանի և Հնդկաստանի միջև։ Ավելի ուշ դրան միացել են Ադրբեջանը, Հայաստանը, Ղազախստանը, Բելառուսը, Օմանը, Թուրքիան, Սիրիան, Տաջիկստանը և Ղրղզստանը։ Տրանսպորտային միջանցքը ձգվում է Սանկտ Պետերբուրգից մինչև հնդկական Մումբայ քաղաք։
