Իսրայելը պետք է պատրաստ լինի Թուրքիայի հետ ուղղակի առճակատման վերջինիս՝ Օսմանյան կայսրությունը վերականգնելու ձգտման ֆոնին։ Այս մասին հայտնում է The Jerusalem Post-ը՝ վկայակոչելով Nagel կոմիտեի զեկույցը (2024թ․ օգոստոսին Իսրայելի կառավարության կողմից ստեղծված հանձնաժողով՝ պաշտպանական բյուջեն և անվտանգության ռազմավարությունը վերլուծելու համար): .
Փաստաթղթում ընդգծվում է ռիսկն առ այն, որ Թուրքիան կմիավորվի սիրիական խմբավորումներին և, մասնավորապես, կսկսի պրոքսի պատերազմ վարել՝ ավելացնելով տարածաշրջանում անկայունությունը։ «Սիրիայից եկող սպառնալիքը կարող է վերածվել ավելի վտանգավոր բանի, քան իրանական սպառնալիքն է»,- ասվում է զեկույցում:
Այս ֆոնին կոմիտեն առաջարկել է առաջիկա հինգ տարիների ընթացքում Իսրայելի պաշտպանության տարեկան բյուջեն ավելացնել 15 միլիարդ շեկելով (4,1 միլիարդ դոլար), լրացուցիչ F-15 կործանիչներ, ինքնաթիռ-տանկերներ, անօդաչու թռչող սարքեր և արբանյակներ գնել, հակաօդային պաշտպանության համակարգերի արդյունավետությունը բարձրացնել և Հորդանանի հովտի երկայնքով կառուցել պաշտպանիչ պատնեշ:
Զեկույցը երկուշաբթի՝ հունվարի 6-ին, ներկայացվել է վարչապետ Բենիամին Նեթանյահուին, պաշտպանության նախարար Իսրայել Կացին և ֆինանսների նախարար Բեզալել Սմոտրիչին։ «Մենք ականատես ենք լինում Մերձավոր Արևելքում հիմնարար փոփոխությունների։ Իրանը վաղուց եղել է մեր ամենամեծ սպառնալիքը, սակայն ասպարեզ են դուրս գալիս նոր ուժեր, և մենք պետք է պատրաստ լինենք անսպասելիին։ Այս զեկույցը «ճանապարհային քարտեզ» է Իսրայելի ապագան ապահովելու համար»,- ասել է Նեթանյահուն։
