Ոստիկանության աշխատակիցներն իրավունք կունենան մուտք գործելու արտաքսման ռեժիմի ենթակա ներգաղթյալների բնակարաններ և այլ տարածքներ՝ նման օտարերկրացիների նկատմամբ պետվերահսկողության շրջանակում։ Ըստ ТАСС-ի՝ համապատասխան կանոնակարգն ամրագրված է օրենքում, որն ուժի մեջ կմտնի մարտի 5-ից:
Բացի դրանից, ոստիկանությունն իրեն իրավունք կվերապահի Ռուսաստանի Դաշնության պետական մարմիններից և օտար պետությունների իշխանություններից պետական վերահսկողության իրականացման համար անհրաժեշտ տեղեկություն և փաստաթղթեր, դրանց թվում՝ առևտրային, բանկային, հարկային և օրենքով պաշտպանված այլ գաղտնիքներ պահանջել, ինչպես նաև բանկերից տեղեկություններ ստանալ արտաքսման ռեժիմում գտնվող օտարերկրացու բանկային հաշիվների առկայության և թվերի, նման հաշիվներով դրամական միջոցների շարժի մասին:
Մարտի 5-ից ՌԴ ՆԳՆ աշխատակիցներն այս ռեժիմով, ներառյալ՝ տեխնիկական միջոցների կիրառմամբ, կկարողանան վերահսկել նաև օտարերկրացիներին։ Այս նորմը տարածվում է նաև ֆիզիկական և իրավաբանական անձանց վրա, որոնք նման օտարերկրացիներին « Ռուսաստանի Դաշնության տարածքում գտնվելու հարցում»աջակցություն են տրամադրում: Ոստիկանությունն իրավունք կունենա օգտվել շարժական սարքերից և աշխարհագրական դիրքից, դեմքի ճանաչման համակարգում աշխատող վճարային համակարգերից։
ՌԴ-ում մարտի 5-ից ուժի մեջ է մտնում երկրում անօրինական գտնվող կամ օրենքը խախտած օտարերկրացիների կամ քաղաքացիություն չունեցող անձանց արտաքսման միգրացիոն ռեժիմը։ Նրանց համար սահմանափակված են որոշակի իրավունքներ և ազատություններ, նրանց նկատմամբ միգրացիայի ոլորտում նաև դաշնային պետական վերահսկողության միջոցներ են կիրառվում։
